தூக்கமின்மைக்கு தீர்வு தரும் சங்கு

ஓஎஸ்ஏ (0bstructive sleep apnea ) என்பது துாங்கும்போது ஏற்படும் பிரச்னை. உறக்கத்தின் போது சிலருக்குத் தொண்டை தசைகள், நாக்கு ஓய்வுபெற்று மூச்சுப் பாதையை அடைத்துவிடும்.

இதனால் சரியாக மூச்சுவிட முடியாது; உடலில் ஆக்சிஜன் தட்டுப்பாடு ஏற்பட்டுத் துாக்கம் கெடும். இரவு துாங்காததால் பகலில் சோர்வு ஏற்பட்டு தினசரி வாழ்க்கை பாதிக்கப்படும்.

இதைச் சரி செய்ய தொடர்ந்து ஆய்வுகள் நடக்கின்றன. சமீபத்தில் ஜெய்ப்பூரைச் சேர்ந்த எடெர்னல் இதய மையம் மற்றும் ஆய்வுக்கூடம் இது தொடர்பான ஓர் ஆய்வு முடிவை வெளியிட்டுள்ளது.

இதில் ஓஎஸ்ஏ பிரச்னை கொண்ட 19 - 65 வயதுடைய குறிப்பிட்ட நபர்கள் ஆய்வுக்கு உட்படுத்தப்பட்டனர். அவர்களில் ஒருபகுதியினர் மூச்சுப்பயிற்சி செய்ய பரிந்துரைக்கப்பட்டது.

மற்றொரு பகுதியினருக்கு தினமும் 15 நிமிடம் வீதம், வாரத்தில் 5 நாட்கள் தொடர்ந்து 6 மாதங்களுக்கு சங்கு ஊதும் பயிற்சி பரிந்துரைக்கப்பட்டது.

பயிற்சி தொடங்கிய சில தினங்களிலேயே அவர்களின் பிரச்னை குறையத் துவங்கியது. இறுதியில் பகல்நேரச் சோர்வு 34 % குறைந்தது. இரவு துாக்கத்தில் ஏற்படும் தொல்லையும் சரியாகியுள்ளது.

அதிக முயற்சி செய்து சங்கை ஊத வேண்டும். அப்போது மூச்சுக்குழாய், தொண்டை ஆகிய பகுதிகள் வலிமை அடைகின்றன. இது ஓஎஸ்ஏ பிரச்னைக்குத் தீர்வாகும் என்பது ஆய்வாளர்களின் கருத்து.