எந்த நேரத்தில் எவ்வளவு கலோரி?

அன்று மின் விளக்குகள் வராத காலத்தில், இரவு உணவை மாலையிலேயே உண்டுவிட்டு உறங்கச் செல்லும் வழக்கம் இருந்தது.

இன்றும் கூட சிலர், சூரியன் மறைந்த பின்னர் சாப்பிட மாட்டார்கள்; அதை ஒரு மரபாகவே பின்பற்றி வருகின்றனர். இது, உடலுக்கு நல்லது என்கிறது சமீபத்திய ஓர் ஆய்வு.

அமெரிக்காவைச் சேர்ந்த கொலம்பியா பல்கலை, அதிக உடல் பருமன் கொண்ட, 50 - 70 வயதுக்கு உட்பட்டவர்களை ஆய்வுக்கு உட்படுத்தியது.

இவர்கள் இரு குழுக்களாகப் பிரிக்கப்பட்டனர். இரு குழுவுக்கும் ஒரே கலோரி அளவுள்ள உணவு, வெவ்வேறு நேரங்களில் கொடுக்கப்பட்டது.

அதாவது, தினசரி கலோரி தேவையில் 45 சதவீதத்தை, குழு 'ஏ'வுக்கு மாலை 5:00 மணிக்கு முன்னரும், குழு 'பி'க்கு மாலை 5:00 மணிக்கு பின்னரும் தந்தனர்.

2 குழுவினரின் ரத்த சர்க்கரை அளவு, இதயச் செயல்பாட்டை பரிசோதித்தனர். குழு 'ஏ'வைச் சேர்ந்தவர்கள் ஆரோக்கியமாகவும், குழு 'பி'யைச் சேர்ந்தவர்களின் ஆரோக்கியம் கெட்டிருப்பதும் தெரியவந்தது.

இந்த ஆய்வின் மூலம், நம் உணவின் பெரும்பகுதியை அதாவது தினசரி கலோரி தேவையில் 45 சதவீதத்தை, மாலை 5:00 மணிக்குள் எடுத்துக் கொள்வது ஆரோக்கியம் தரும் என நிரூபணம் ஆகியுள்ளது.