உடலுக்கு வலிமை தரும் உளுந்தங்களி ரெசிபி

1 கப் கருப்பு உளுந்து, 1/4 கப் கவுனி அரிசியை நன்றாக கழுவி சிறிது நேரம் உலர விடவும். அடுப்பில் கடாயை வைத்து நன்றாக வாசனை வரும் வரை கிளறி, ஆறவிடவும்.

மிக்சி ஜாரில் 2 ஏலக்காயுடன் சேர்த்து பவுடராக அரைக்கவும். இதை கடாயில் 3 கப் தண்ணீருடன் சேர்த்து, கட்டிகள் தட்டாமல் நன்றாக கரைத்து விடவும்.

அடுப்பை மிதமான தணலில் வைத்து, உளுந்து கரைசலை கை விடாமல் கிளறிக் கொண்டே இருக்கவும். கெட்டியான பதம் வந்தவுடன், 1.5 நாட்டுச்சர்க்கரையை சேர்த்து கிளறவும்.

மீண்டும் கலவை கெட்டியாகி அல்வா பதத்துக்கு வந்தவுடன் 1 கப் நல்லெண்ணெயை சேர்த்து கிளறவும்.

கைவிடாமல் சில நிமிடங்கள் கிளறிக்கொண்டே இருந்தால், எண்ணெயை களி நன்றாக உறிஞ்சிவிடுவதுடன், கடாயில் சிறிதும் ஒட்டாமல் வரும்.

தொடர்ந்து சில நிமிடங்கள் கிளறினால் களியில் இருந்து எண்ணெய் பிரியத்துவங்கும் போது அடுப்பை அணைக்கவும்; இப்போது, சுவையான, ஆரோக்கியமான உளுந்தங்களி ரெடி.

நாட்டுச்சர்க்கரைக்கு பதிலாக வெல்லம், கருப்பட்டி போன்றவற்றையும் சேர்க்கலாம். சுவைக்கேற்ப இனிப்பின் அளவை கூடுதலாகவும் சேர்க்கவும்.

கருப்பு உளுந்தில் கால்சியம், பாஸ்பரஸ், பொட்டாசியம், இரும்புச்சத்து உட்பட பல்வேறு ஊட்டச்சத்துகள் நிறைந்துள்ளன.

உணவில் இதை அடிக்கடி பயன்படுத்த எலும்புகளின் வலிமை அதிகரிப்பதுடன், மூட்டுவலி, கை, கால் சோர்வில் இருந்து விடுபடவும் உதவுகிறது.