விரதமிருக்க சிறந்த நேரம் எது?

உடல் பருமன் என்பது உலகம் முழுக்க அச்சுறுத்திக் கொண்டிருக்கும் ஒரு வாழ்வியல் நோய். இதனால், நீரிழிவு, இதய நோய்கள், சில வகை புற்று நோய்கள் ஏற்படும் அபாயமுள்ளது.

எனவே, உடல் பருமனை குறைப்பதற்கு பல்வேறு மருத்துவ ஆய்வுகள் நடக்கின்றன.

இரவு உணவை தவிர்த்து விட்டு மாலை 5:00 மணிக்கே சாப்பிட்டு முடிப்பது நல்லது என சில ஆய்வுகள் கூறுகின்றன. இன்டர்மிடென்ட் பாஸ்டிங் விரத முறை தற்போது பிரபலமாகி வருகிறது.

இதிலும் கூட எந்த நேரத்தில் உணவு சாப்பிடலாம்; எந்த நேரத்தில் விரதம் இருக்கலாம் என்பதில் பல்வேறு கருத்துக்கள் உள்ளன.

ஸ்பெயின் நாட்டின் க்ரானடா பல்கலை ஆய்வில் ஒரு பகுதியினர் காலை 9:00 - 5:00 மணிக்கு இடைப்பட்ட காலத்தில் உணவு உண்ணலாம்; மற்ற நேரங்களில் விரதமிருக்க வேண்டும்.

அடுத்த பகுதியினர் மதியம் 2:00 முதல் இரவு 10:00 மணி வரை சாப்பிடலாம்; 3வது பகுதியினர் இரவு 12:00 முதல் மாலை 8:00 மணி வரை எந்த நேரமும் சாப்பிடலாம். மற்ற நேரங்களில் கூடாது.

ஆய்வின் முடிவில், மற்ற 2 பகுதியினரை விட காலை 9:00 முதல் மாலை 5:00 மணி வரை மட்டும் உணவு உட்கொண்டு, மற்ற நேரங்களில் விரதமிருந்தவர்கள் நல்ல மாற்றம் கண்டனர்.

இவர்களுக்கு உடல் பருமன், குறிப்பாக வயிற்று பகுதிகளிலுள்ள கொழுப்பு குறைந்திருப்பது தெரிந்தது. எனவே, இன்டர்மிடென்ட் பாஸ்டிங் இருக்க சரியான நேரம் இது என ஆய்வுகள் கூறுகின்றன.