நிறம் மாறும் நகங்கள்.. நோய் அறியலாமா?

நகங்களில் ஏற்படும் சில மாற்றங்களை வைத்து, உடல் நோய்களுக்கான அறிகுறிகளை எளிதில் கண்டுபிடித்து விடலாம். மேலும் நகங்களின் ஆரோக்கியத்தை வைத்தே உடலின் ஆரோக்கியத்தை கணித்து விடலாம் என மருத்துவர்கள் தெரிவிக்கின்றனர்.

நகத்தில் சின்ன சின்னக் குழிகள் உண்டாகி, அவற்றில் வெடிப்பு ஏற்பட்டு செதில் செதிலாக உதிர்ந்தால், சொரியாசிஸ் என்ற தோல் வியாதியின் அறிகுறியாகும்.

ரத்தத்தில் போதிய அளவுக்கு ஆக்சிஜன் இல்லாவிட்டால், நகங்கள் நீலமாக இருக்கும். ஆர்சனிக் என்ற நச்சுக்களால் பாதிக்கப்பட்டிருந்தால், நகங்கள் நீலநிறத்தில் காணப்படும்.

இளஞ்சிவப்பு நிறங்களில் உள்ள கைவிரல் நகங்களில் நிலவு போன்று சிறு வளர்பிறை வடிவம் இருந்தால் உடலில் ரத்த ஓட்டம் சீராக இருக்கிறது என்று அர்த்தம்.

அதுவே நகங்கள் நீல நிறமாக மாறியிருந்தால், ஆஸ்துமா, நுரையீரல் தொடர்பான நோய்களுக்கான அறிகுறியாக கருதப்படுகிறது. ரத்தத்தில் உள்ள சிவப்பணுக்களில் ஆக்ஸிஜன் அளவு குறைவதும் இதற்கு காரணமாகும்.

கல்லீரல் பாதிப்பு, சிறுநீரக நோய், வைட்டமின் பி12 பற்றாக்குறை, போன்றவற்றால் நகம் கருப்பு நிறமாக மாறக்கூடும்.

நகங்கள் வெளிறிய நிறத்தில் காணப்பட்டால் ரத்த சோகையாக இருக்கலாம்.

உடம்பில் துத்தநாக சத்து குறைபாடு இருத்தால் நகத்தில் வெள்ளை நிறப்புள்ளிகள் தோன்றும்.

பூஞ்சை தொற்று, நீரிழிவு, கல்லீரல் நோய் உள்ளவர்களுக்கு நகங்கள் மஞ்சள் நிறத்தில் காணப்படும்.