குளிர்காலத்தில் தயிர் சாப்பிடலாமா?

பாலில் இருந்து தயாரிக்கப்படும் தயிரில் அத்தியாவசிய ஊட்டச்சத்துக்கள், வைட்டமின்கள் மற்றும் தாதுக்கள் உள்ளன. கால்சியம் அதிகம் கொண்ட உணவுப்பொருளாகவும் உள்ளது.

இவ்வளவு நன்மைகள் கொண்ட தயிரைக் குளிர்காலத்தில் சாப்பிடலாமா? என்ற குழப்பம் பலருக்கு உள்ளது. சளி, இருமல் பாதிப்பு வருமோ என பலரும் தவிர்ப்பர்.

ஆனால் குளிர்காலத்திலும் தயக்கமின்றி தயிரை சாப்பிடலாம். இரவில் உட்கொள்வதாக இருந்தால் தயிருடன் சிறிதளவு உப்பு அல்லது சர்க்கரை சேர்த்து சாப்பிடுவது ஆரோக்கியத்திக்கு நல்லது.

பகல் பொழுதிலும் தயிர் உட்கொள்வதற்கு யோசிப்பவர்களும் இந்த வழிமுறையை பின்பற்றலாம்.

குளிர்காலத்தில் வரும் சரும பிரச்னைகளில் முக்கியமானது சரும வறட்சி. சருமத்திற்கு ஈரப்பதமூட்டும் பொருட்கள் தயிரில் இயற்கையாகவே உள்ளன. அவை சருமம் வறட்சியாகாமல் தடுக்கும்.

முகப்பரு பிரச்னை இருப்பவர்களுக்கு தயிர் சிறந்த மருந்தாக அமையும். இதில் லாக்டிக் அமிலம் இருப்பதால் முகத்தை அழகுபடுத்தும் பேஸ் பேக்காகவும் உபயோகிக்கலாம்.

குளிர்காலத்தில் உணவில் கலந்து சாப்பிடுவதோடு சமையலிலும் தயிரை சேர்த்துக்கொள்ளலாம்.

சப்பாத்திக்கு மாவு பிசையும்போது அதனுடன் சிறிது தயிரும் சேர்க்கும்போது, ஊட்டச்சத்துகள் கிடைக்கக்கூடும்; சப்பாத்தியும் மிருதுவாக இருக்கும்.

ஒரு சிலர் குளிர்காலத்தில் மந்தமாகவோ, சோர்வாகவோ உணரலாம். அவர்கள் மாதுளை அல்லது ஸ்ட்ராபெர்ரி பழத்துடன் தயிர் கலந்து சாப்பிடுவது புத்துணர்வை அளிக்கும்.

குழந்தையின் உணவில் ஆரோக்கியமான ஊட்டச்சத்துக்களை சேர்க்க தயிர் பயன்படுத்தலாம். காய்கறிகளுடன் தயிர் சேர்த்து சாலட்டாக தயாரித்து கொடுப்பது சிறந்தது.