ஹெல்த்தியான பலாக்கொட்டை பொடிமாஸ்... குட்டீஸ்கள் விரும்பிச் சாப்பிடுவர் !

முக்கனிகளில் ஒன்றான பலாப்பழத்தில் ஏராளமான சத்துக்கள் நிறைந்திருப்பது அனைவரும் அறிந்ததுதான். பலாப்பழத்தை போன்றே அதன் கொட்டையிலும் சத்துக்கள் உள்ளன.

1/4 கிலோ பலாக்கொட்டைகளை வேக வைத்து தோல் உரித்துக் கொள்ளவும். இதை காய்கறி துருவலில் துருவி எடுத்துக் கொள்ளலாம். இல்லாவிட்டால், மிக்ஸி ஜாரில் கொரகொரப்பாக அரைத்துக் கொள்ளவும்.

பலாக்கொட்டைகள் நன்றாக சூடு ஆறியவுடன் தான் அரைக்கவோ அல்லது துருவவோ வேண்டும். அப்போதுதான் நன்றாக உதிரி உதிரியாக கிடைக்கும். இல்லாவிட்டால் குழைந்து விடும்; சுவையும் குறையக்கூடும்.

கடாயில் சிறிதளவு எண்ணெய் ஊற்றி காய்ந்தவுடன் கடுகு, கடலைப்பருப்பு, உளுத்தம்பருப்பு ஆகியவை தலா 1/4 டீஸ்பூன் வீதம் போட்டு தாளிக்கவும்.

இதில், ஒரு கொத்து கறிவேப்பிலை, கைப்பிடியளவு நறுக்கிய சிறிய வெங்காயம், 5 காய்ந்த மிளகாய், 1/4 டீஸ்பூன் மஞ்சள் தூள், 1 சிட்டிகை பெருங்காயத்தூள், தேவையானளவு உப்பு சேர்த்து வதக்கவும்.

பின், துருவிய பலாக்கொட்டைகளையும் சேர்த்து நன்றாக வதக்க வேண்டும். ஏற்கனவே, பலாக்கொட்டைகளை வேக வைத்திருப்பதால், ஒரு சில நிமிடங்கள் வதக்கினாலே போதுமானது.

பொடியாக நறுக்கிய கொத்தமல்லி இலைகளை தூவினால், இப்போது சுவையான, ஆரோக்கியமான பலாக்கொட்டை பொடிமாஸ் ரெடி. இதில், ஒரு சில பலாக்கொட்டைகளை மட்டும் சிறு சிறு துண்டுகளாகவும் சேர்க்கலாம்.