ஆன்லைன் ரயில் முன்பதிவு டிக்கெட்டை வேறு தேதிக்கு இனி மாற்றலாம்
'ஆன்லைன்' வாயிலான ரயில் டிக்கெட் முன்பதிவில், பயணத் தேதியை மாற்ற விரும்பும் பயணியர், டிக்கெட்டை ரத்து செய்து புதிதாக மீண்டும் பதிவு செய்ய வேண்டியுள்ளது.
ரத்து செய்யும் போது அதற்கான கட்டணம் பிடிக்கப்பட்டு, பயணியருக்கு கூடுதல் செலவும், சிரமமும் ஏற்படுகிறது.
இம்முறையில் மாற்றம் கொண்டு வர ரயில்வே அமைச்சகம் ஆலோசித்து வந்த நிலையில், அதற்கான புதிய திட்டம் வரும் ஜனவரியில் அறிமுகமாகவுள்ளது.
அதன்படி, உறுதி செய்யப்பட்ட ஆன்லைன் முன்பதிவு டிக்கெட் வைத்துள்ள பயணியர், பயண தேதியில் மாற்றம் ஏற்பட்டால் டிக்கெட்டை ரத்து செய்யாமல் வேறு தேதிக்கு மாற்றிக்கொள்ளலாம்.
இவ்வசதி குறித்த தகவலை ரயில்வே அமைச்சர் உறுதி செய்துள்ளார்.
வேறு தேதியில் டிக்கெட்டுகள் இருந்தால் மட்டுமே மாற்றம் செய்ய முடியும்.
மாற்றப்படும் தேதிக்கான கட்டணம் அதிகமெனில், வித்தியாச தொகையை மட்டும் செலுத்த வேண்டும். வேறு கூடுதல் கட்டணங்கள் இல்லையென தெரிவிக்கப்பட்டுள்ளது.