ஆரோக்கிய நன்மைகள் நிறைந்த மாதுளை டீ !

மாதுளை தோலில், விட்டமின் 'சி'யுடன் கால்சியம், மெக்னீசியம் சத்துக்களும் அதிகமுள்ளதால், ஈறுகளில் வரும் ரத்தக் கசிவைத் தடுப்பதுடன், பற்களில் சிதைவு, சொத்தை ஏற்படும் வாய்ப்பை குறைக்கும்.

இதிலுள்ள ஆன்டி-ஆக்ஸிடன்ட், பாக்டீரியா எதிர்ப்பு மற்றும் அழற்சி எதிர்ப்பு பண்புகள் உடலில் நோய் எதிர்ப்புச் சக்தியை அதிகரிக்கிறது.

இதிலுள்ள டானின் பண்புகள் குடல் ஆரோக்கியத்தை மேம்படுத்த உதவுகிறது.

மாதுளை தோலில் உள்ள வைட்டமின் சி, ஆக்ஸிஜனேற்றிகள், அழற்சி எதிர்ப்பு பண்புகள் சரும ஆரோக்கியத்தை மேம்படுத்த உதவுகிறது.

எனவே, மாதுளம் பழத்தை சாப்பிட்டு, தோலை துாக்கி எறியாமல், சுத்தம் செய்து சிறு துண்டுகளாக்கி, அதில் டீ தயாரித்து குடிக்கலாம்.

இல்லாவிட்டால், தோலை வெயிலில் நன்றாக காயவைத்து, மிக்சி ஜாரில் கொரகொரப்பாக அரைத்தும் பயன்படுத்தலாம்.

சிறிது மாதுளை தோலை எடுத்து இரண்டு டம்ளர் நீரில் கொதிக்க வைக்க வேண்டும். இதில், 1/4 டீ ஸ்பூன் மஞ்சள், 1 சிட்டிகை ஏலக்காய் துாள் சேர்த்து, ஒரு டம்ளராக வற்றியதும், வெது வெதுப்பாக குடிக்கலாம்.

இனிப்பு சுவைக்கு பனங்கற்கண்டு அல்லது நாட்டுச் சர்க்கரை சேர்த்துக் கொள்ளலாம்.

எலும்புகளை வலுவடைய செய்யும், கால்சியம், மெக்னீசியம் இதில் அதிகம் உள்ளதால், காலை, மாலை என எப்போது வேண்டுமானாலும் குடிக்கலாம்.