பொதுப் போக்குவரத்துகளை ஒன்றாக இணைக்கும் வகையில் உருவாக்கிய சென்னை ஒன்று மொபைல் செயலியை முதல்வர் ஸ்டாலின் துவக்கி வைத்தார்

சென்னை பெரு நகரில் மாநகர பேருந்து, புறநகர் மின்சார ரயில், மெட்ரோ ரயில் ஆகிய பொது போக்குவரத்து வசதிகள் உள்ளன.

இதில், ஒரு சேவையை பயன்படுத்தும் நபர், அடுத்த சேவைக்கு மாறும் போது சில நடைமுறை சிக்கல்கள் உள்ளன.

குறிப்பாக, வெவ்வேறு வழிகளில் கட்டணம் செலுத்தி, பயணச்சீட்டு பெறுவதில், பயணியர் பல்வேறு சிரமங்களை சந்திக்கின்றனர்.

இதற்கு தீர்வாக க்யூ.ஆர்., குறியீட்டை அடிப்படையாக வைத்து, ஒரே டிக்கெட்டில் அடுத்தடுத்த சேவைகளை பயன்படுத்தும் திட்டம், 2023ல் அறிவிக்கப்பட்டது.

இதன்படி, பயணியர் வெளியில் செல்லும்போது எந்தெந்த பொது போக்குவரத்து சேவைகளை பயன்படுத்தலாம் என்று முன்கூட்டியே முடிவு செய்ய வேண்டும்.

பின் அதற்கான வழித்தடங்களை குறிப்பிட்டு கட்டணம் செலுத்தினால், அதற்கு, க்யூ.ஆர்., குறியீட்டு டிக்கெட் மொபைல் போனில் கிடைக்கும்.

இந்த குறியீட்டை காட்டி, அந்தந்த பொது போக்குவரத்து சேவைகளில் மக்கள் பயணிக்கலாம்.

ஒவ்வொரு சேவையிலும் தனித்தனியாக டிக்கெட் எடுக்கும் வேலை இருக்காது. இந்த புதிய செயலியின் சோதனை ஓட்டம் முடிவடைந்த நிலையில், இத்திட்டம் இன்று முதல் நடைமுறைக்கு வந்தது.