மதுரை, திருநெல்வேலி, தஞ்சாவூர், திருச்சி மாவட்டங்களுக்கு இணையாக விருதுநகர் மாவட்டத்தில் மாவட்டத்தில் விவசாய நிலங்களும், இவற்றில் விவசாயமும் செய்யப்பட்டு வருகிறது. சில ஆண்டுகளாக பருவநிலை மாற்றம், கால சூழ்நிலையால் மழை பொழிவும் பருவம் தவறி பெய்கிறது. பெய்கிற பழையும் கனமழையாக தொடர்ந்து பெய்கிறது.

முன்பு, விருதுநகர் மாவட்டத்தில் மழை காலத்தில் கூட, ஒரு சில நாட்கள் தான் மிதமான மழை பெய்யும். ஆனால், கால சூழ்நிலையில் கோடை காலத்தில் கூட கனமழை பெய்கிறது. இருப்பினும், மாவட்டத்தில் பல நீர்நிலைகள் முறையான பராமரிப்பு இன்றி போனதால், பெய்கிற மழையை தேக்க முடியவில்லை. கண்மாய்களிலும் கரைகளை பலப்படுத்துதல், ஷட்டர்கள் பழுது நீக்குதல், துார் வாறுதல், மழைநீர் ஒடைகளை சரி செய்தல் என எதுவும் தரமானதாக செய்யப்படவில்லை. செய்கிற பணிகளையும் கடமைக்கு செய்கின்றனர். இதனால், மழை பெய்தாலும் கண்மாய்கள் நிறைவது இல்லை. தேங்குகிற தண்ணீரும் வெளியேறி விடுகிறது. தேவையான தண்ணீர் இல்லாததால் விவசாயிகள் தங்கள் விவசாயத்தை குறைத்து கொண்டே வருகின்றனர்.

தற்போது பெய்கின்ற தொடர் கனமழையால் ஒரே நாளில் கண்மாய்கள் நிறைந்து விடும் அளவிற்கு பெய்கிறது. இதை கருத்தில் கொண்டு பெரிய கண்மாய்களை துார் வாரி, கரைகளை பலப்படுத்தியும், கண்மாய்களை ஆழப்படுத்தவும் வேண்டும்.

விவசாய சங்க மாவட்ட தலைவர் ராம்பாண்டியன்: விருதுநகர் மாவட்டத்தில் நில அமைப்பு பெரும்பகுதி மானாவாரி நிலமும், கண்மாய்கள் பாசன வசதி பெறும் நிலங்களாக மாறி மாறி இருக்கும். பல ஆண்டுகளாக கண்மாய்கள் துார்வாரப்படாமலும், ஆழப்படுத்தாலும், கரைகள் பலமிழந்தும் உள்ளன. நீர்பாசன துறை அலட்சியமாக உள்ளது. தற்போது உள்ள பருவநிலை மாற்றத்தால் கனமழை தொடர்ந்து பெய்து ஒரே நாளில் கண்மாய்கள் நிறைந்து விடும் நிலை உள்ளது. ஆனால், கன மழையை தாங்க கூடிய பலம் கண்மாய்களுக்கு இல்லை. இனிவரும் காலங்களிலாவது சுதாரித்து நீர்நிலைகளை பாதுகாத்து விவசாயத்தை காப்பாற்ற வேண்டும்.