காட்டி கொடுக்காத கம்யூ.,

தேர்தல் பிரசாரத்தின் போது, 'எது உண்மை, எது பொய்' என பிரித்தறிய இயலாது தவித்த சகோதரா... தேர்தல் முடிவுக்குப் பின் நீ படிப்பதிலும், பார்ப்பதிலும், கேட்பதிலும் 'உண்மை எது, பொய் எது' என சரியாக கணிக்க முடிகிறதா; எங்கே... சோதித்துப் பார்க்கலாமா?

1 'தமிழகத்தில் நிகழ்ந்திருப்பது அரசியல் பேரிடர்' எனும் உங்கள் கருத்தை நாங்கள் ஏற்க, 'தி.மு.க., தோல்விக்கான காரணங்களில் 'வாரிசு அரசியல்' முதன்மை காரணம்' எனும் 'உண்மை'யை நீங்கள் ஏற்பீர்களா உதயநிதி ஸ்டாலின்?' - இப்படி கேட்கத் தோன்றுகிறதா?

2 'தி.மு.க., ஆட்சியின்போது நேர்மையான அதிகாரிகளின் கைகள் கட்டப்பட்டிருந்தன' என்று மா.கம்யூ., எம்.பி., சு.வெங்கடேசன் சொன்னதும், 'அவர்கள் யார்' என கேட்காதோர் 'உண்மை'யின் உருவங்கள்; என்ன... இது சரிதானே?

3 'துரோகிகள் வெளியேறுவதால் தொண்டர்கள் யாவரும் பெரும் மகிழ்ச்சியோடு உள்ளனர் என அ.தி.மு.க., பொதுச்செயலர் பழனிசாமி சொன்னதை அ.தி.மு.க., நிர்வாகிகள் அப்படியே நம்பினர்' எனும் செய்தி 'பொய்' கலப்பற் றதா?

4 'த.வெ.க.,வில் இணைந்த கம்யூ., மூத்த தலைவர் சி.மகேந்திரன் தவறு செய்தவர்' என இ.கம்யூ., கட்சி சொன்னபோது, 'கட்சியில் இருக்கும் வரை யாரையும் இ.கம்யூ., காட்டிக் கொடுக்காது' எனும் 'உண்மை' உனக்கு புரிந்ததா?

5 த.வெ.க., பக்கம் செல்லும் தன் கூட்டணி கட்சியினரை பெரிதாக வசைபாடாத தி.மு.க., தலைவரின் பொறுமை, 'நடப்பவை நாடகம்' என்பதாக சிலருக்கு உணர்த்து கிறதாம்; இப்படி சிந்திக்கும் மனம் 'உண்மை' விரும்புகிறதா?

6 'த.வெ.க., அரசுக்கு கவசமாக இருந்து ம.தி.மு.க., காக்கும்' என்று வைகோ உணர்ச்சிப் பொங்க பேசியபோது, 'இவர் 'உண்மை'யை மட்டுமே சொல்வார்; சொன்னதை மட்டுமே செய்வார்' என்று நம் முதல்வர் நம்பி இருப்பாரா?

7 'இந்தியாவிற்கு வரும் வெளிநாட்டு முதலீடுகளில் ஆந்திராவிற்கு மட்டும் 25 சதவீதம் வருகிறது' என்று ஆந்திர முதல்வர் சொன்னதும், 'அய்யோ...' என்றோ, 'அது பொய்' என்றோ அலறாத நம் மனம் யாரை, எதை 'உண்மை' என நம்புகிறது?

7 ½ 'எம்.எல்.ஏ.,க்கள் ராஜினாமா, ஜனநாயகப் படுகொலை' - இது பொய்யா?