முன்னோரின் ஆசியைப்பெற கடவுள் கொடுக்கும் அரிய வாய்ப்பு அமாவாசை. ஆண்டிற்கு 96 முறை முன்னோர்களை நினைத்து சிராத்தம் செய்ய வேண்டும் என்கிறது சாஸ்திரம். அதனைப்பின்பற்ற முடியாவிட்டாலும் அமாவாசை நாட்களிலாவது சிராத்தம் செய்வது நல்லது. சிராத்தத்தின் மகிமையை மக்களுக்கு உணர வைக்கும் பொருட்டு பக்தருக்காக கடவுளே வந்து சிராத்தம் செய்த நிகழ்வு வரலாற்றுச் சிறப்புமிக்கது.

* திருவண்ணாமலை அண்ணாமலையார் தனது பக்தனான வல்லாள மகாராஜாவிற்கும், தென்காசி மாவட்டம் கரிவலம் வந்த நல்லுார் பால்வண்ண நாதர் தனது பக்தனான வரதுங்கர் மன்னருக்கும் குழந்தைபேறு இல்லாததால் அவர்களுக்கு திதி கொடுத்தார். இவ்வைபவம் ஆண்டுதோறும் மாசி மகம், மார்கழி சதுர்த்தசி தினங்களில் நடைபெறும்.

* குடந்தை சாரங்கபாணி கோயில் கோபுரம் 140 அடி உயரமுடையது. இதனை திருப்பணி செய்தவர் லட்சுமி நாராயணர் என்னும் வைணவ பக்தர். தனது வாழ்நாளை பெருமாளுக்கே அர்ப்பணித்தவர். இவர் ஒரு தீபாவளி நாளன்று பரமபதம் அடைந்தார். அந்தப்பக்தருக்காக சாரங்கபாணியாகிய ஆராவமுதப்பெருமாளே சிராத்தம் செய்தார் என்பது ஐதீகம். ஒவ்வொரு தீபாவளி தினத்தன்று இந்த ஐதீக விழா அங்கு சிறப்பாக நடைபெறும்.