அசாமில், முதல்வர் ஹிமந்த பிஸ்வ சர்மா தலைமையில் பா.ஜ., ஆட்சி நடக்கிறது. இங்குள்ள நாகவுன் லோக்சபா தொகுதி எம்.பி.,யாக, காங்கிரஸ் கட்சியின் பிரத்யுத் என்பவர் இருந்தார். கடந்த மார்ச்சில், தன் எம்.பி., பதவியை ராஜினாமா செய்த பிரத்யுத், பா.ஜ.,வில் இணைந்தார். ஏப்ரலில் நடந்த சட்டசபை தேர்தலில், பா.ஜ., சார்பில் போட்டியிட்டு எம்.எல்.ஏ.,வாகி விட்டார்.

இதையடுத்து, நாகவுன் லோக்சபா தொகுதிக்கு இன்று இடைத்தேர்தல் நடக்கிறது. காங்கிரஸ், பா.ஜ., கட்சிகளுடன், அசாமில் செயல்படும் அகில இந்திய ஜனநாயக முன்னணி என்ற கட்சியின் நிறுவனரான முன்னாள் எம்.பி., பத்ருதீன் அஜ்மலும் வேட்பாளராக களமிறங்கியுள்ளார். இதனால், தேர்தலில் மும்முனை போட்டி நிலவுகிறது.

கடந்த 20 நாட்களுக்கும் மேலாக அனல் பறக்கும் பிரசாரம் நடந்தது. பா.ஜ.,வினரை கடுமையாக விமர்சித்தார் பத்ருதீன் அஜ்மல். அவருக்கு பதிலடி கொடுத்த முதல்வர் ஹிமந்த பிஸ்வ சர்மா, ‘சாப்பிடுவதற்காகவே பிறந்தவர் பத்ருதீன்; அரசு பணத்தை எல்லாம் தின்றே தீர்த்து விட்டார்...’ என்றார்.

இதற்கு பதிலடியாக, ‘ஆம்; நான் பிரியாணி சாப்பிடுவதற்காகவே பிறந்தவன்...’ என்றார் பத்ருதீன். சர்மா சும்மா இருப்பாரா...? ‘விலங்குகளுக்கு பிரியாணி தான் பிடிக்கும்...’ என்றார்.

இதை பார்த்த அசாம் மக்கள், ‘இவர்களுக்கு நாகரிகமாகவே பேசத் தெரியாதா...?’ என புலம்புகின்றனர்.