மாணவரோ, குடும்பத் தலைவியோ, வணிகம் செய்பவரோ, விஞ்ஞானியோ, தொழில் வல்லுனரோ அல்லது வெறுமே உலக நடப்புகளை தெரிந்துகொள்ள விரும்புகிறவரோ, யாராக இருந்தாலும் அவர்கள் தெரிந்துகொள்ள வேண்டிய செய்திகள் தினமலர் நாளிதழில் கண்டிப்பாக இருக்கும். உள்ளூர் முதல் உலகச் செய்திகள் வரை ஓர் பறவையின் பார்வையில் செய்திகளை தொகுத்துத் தருவது தினமலரின் தனிச்சிறப்பு.

ஆங்கிலம் அவ்வளவாக தெரியாத குறு, சிறு தொழில் வணிக துறையினரும் தங்கள் வளர்ச்சிக்காக தெரிந்துகொள்ள வேண்டிய பல முக்கிய பிசினஸ் செய்திகளை எளிய தமிழில் 'தொழில்' பகுதியில் வெளியிடுவதை மிகவும் வரவேற்கிறோம். தமிழில் ஒரு பிசினஸ் நாளிதழாகவும் தினமலர் உருவாகியிருப்பது பாராட்டுக்குரியது. இதற்கு இன்னும் ஒரு பக்கம் ஒதுக்கலாம் என்பது எனது ஆலோசனை. செய்தியின் ஆழத்தை வாசகர்கள் சரியாகப் புரிந்துகொள்ள வேண்டும் என்ற அடிப்படை நோக்கத்தில், ஆங்கில டெக்னிக்கல் வார்த்தைகளை வலிந்து தமிழாக்கம் செய்யாமல் அப்படியே தமிழில் வெளியிடுவது வரவேற்கத்தக்க யதார்த்தம்.

செய்தியை முழுமையாக படிக்கத் துாண்டும் வகையில், தலைப்பில் வார்த்தைகளை கையாளும் திறன் தினமலர் நாளிதழுக்கே உரித்தானது. சில நேரங்களில் அதில் ரசிக்கும்படியான நையாண்டியும் இருக்கும். அண்மையில் நான் ரசித்த அத்தகைய தலைப்பு, 'சாலைகளை சேதப்படுத்தி 3 நாளுக்கு கொடி கட்டலாம் - அனுமதி தர போலீசுக்கு அரசு உத்தரவு'.

75 ஆண்டு நிறைவு பவளவிழா கொண்டாடும் தினமலர், காலத்திற்கேற்ப பல்வேறு பரிணாமங்களில் வளர்ச்சி பெற்று, அதன் பணி தமிழிருக்கும் வரை தொடரவேண்டும் என என் சார்பாகவும், நான் பொறுப்பேற்றுக் கொண்டிருக்கும் பல்வேறு அமைப்புகளின் சார்பாகவும் வாழ்த்துகிறேன்.

-எஸ்.ரத்தினவேல்,

நிறுவனர், தலைவர் மற்றும் மேலாண்மை இயக்குனர்,

வேளாண் உணவு வர்த்தக மையம், மதுரை

தலைவர், அக்ரி மற்றும் அனைத்து தொழில் வர்த்தக சங்கம்.