டவுட் தனபாலு: தி.மு.க., - அ.தி.மு.க.,வுக்கு அடுத்தபடியா, தமிழகம் முழுக்க செல்வாக்கும், ஓரளவுக்கு ஓட்டு வங்கியும் உள்ள கட்சி என்றால், அது உங்களது, காங்., கட்சி தான்... அது, பிரமாண்ட கட்சியா உங்க கண்ணுக்கு தெரியலையா... உங்க கட்சியை பற்றி நீங்களே குறைத்து மதிப்பிடலாமா என்ற, 'டவுட்' தான் வருது!

தமிழக, பா.ஜ., முன்னாள் தலைவர் அண்ணாமலை: கடந்த, 1967 சட்டசபை தேர்தல் பிரசாரத்தின் போது, காமராஜர் குறித்து கருணாநிதி பேசியதை இன்று வெளியிட்டால், மானமுள்ள ஒரு காங்கிரசார் கூட, தி.மு.க., கூட்டணியில் இருக்க மாட்டார்கள். காமராஜர், தன் கடைசி காலத்தில், 'இரு கழகங்களும் ஒரே குட்டையில் ஊறிய மட்டைகள்' என்றார். அப்படி இருக்கும் போது, திருச்சி சிவா வரலாற்றை மாற்றி, மக்களை குழப்புவதை கண்டிக்கிறேன்.

டவுட் தனபாலு: காமராஜர் கூறியதை யாரும் மறுக்கவும் இல்லை; மறக்கவும் இல்லை... ஆனா, அந்த, ஒரே குட்டையில் ஊறிய மட்டைகளில் ஒன்றில் தானே, உங்க கட்சி இப்ப கூட்டணி வச்சிருக்கு என்பதை நீங்க மறந்துட்டீங்களோ என்ற, 'டவுட்' தான் வருது!

நாம் தமிழர் கட்சியின் தலைமை ஒருங்கிணைப்பாளர் சீமான்: டி.என்.பி.எஸ்.சி., 'குரூப் - 4' தேர்வில், 'விடியல் பயணம் எப்போது துவங்கியது' என்றும், ஈ.வெ.ரா., குறித்தும் கேள்விகள் கேட்கப்பட்டு உள்ளன. வ.உ.சி., காமராஜர், முத்துராமலிங்கதேவர், நல்லகண்ணு போன்றவர்களை போல, நாட்டின் விடுதலைக்காக போராடி, ஈ.வெ.ரா., சிறைக்கு சென்றதில்லை. அப்படி இருக்க, அவர் குறித்த கேள்விகள் அறிவார்ந்தவையா?

டவுட் தனபாலு: அது சரி... 'குரூப் - 4' தேர்வுல ஜெயிக்கிறவங்க, திராவிட மாடல் அரசிடம் தானே பணி புரியணும்... 'நம்ம அரசின் திட்டங்கள், நம்ம இயக்கத்தின் முன்னோடிகளை பத்தி தெரியாதவங்க, திராவிட மாடல் அரசில் பணி புரிய தகுதியில்லாதவங்க'ன்னு கருதி, கேள்விகளை தயார் பண்ண சொல்லியிருப்பாங்களோ என்ற, 'டவுட்' தான் வருது!