டவுட் தனபாலு: அதாவது, 1,100 டாக்டர் பணியிடங்களுக்கும் எப்பவோ டாக்டர்களை தேர்வு பண்ணி முடிச்சிருப்பாங்க... விண்ணப்பங்கள் வாங்குறது எல்லாம் வெறும் கண்துடைப்பா இருக்கும்... அதனால தான், 'காலிப்பணியிடங்களே இல்லன்னு அமைச்சர் சொல்றாரோ' என்ற, 'டவுட்' உங்களுக்கு வரலையா?

தி.மு.க., தலைமை அலுவலகம் அறிக்கை: மகளிர் உரிமைத் தொகை, இலவச பஸ் பயணம், புதுமை பெண், தோழி விடுதி உட்பட பல நலத்திட்டங்களை, மகளிர் மேம்பாட்டுக்காக, முதல்வர் ஸ்டாலின் செயல்படுத்தி வருகிறார். இதனால், வரும் 29ம் தேதி மாலை, 4:00 மணிக்கு, திருப்பூர் மாவட்டம், பல்லடத்தில், 'வெல்லும் தமிழ் பெண்கள்' என்ற பெயரில், தி.மு.க., மேற்கு மண்டல மகளிர் அணியின் மாநாடு நடக்க உள்ளது. தி.மு.க., துணை பொதுச்செயலர் கனிமொழி தலைமை வகிக்க உள்ளார். முதல்வர் ஸ்டாலின் பங்கேற்று பேசுகிறார்.

டவுட் தனபாலு: இப்பதான், திருவண்ணாமலையில், வடக்கு மண்டல இளைஞர் அணி நிர்வாகிகள் மாநாட்டை, உதயநிதி நடத்தி முடிச்சிருக்கார்... இதனால, உதயநிதி மாநாட்டுக்கு போட்டியா, லட்சக்கணக்கான மகளிரை திரட்டி, முதல்வரை அசத்த கனிமொழி முடிவு பண்ணிட்டாங்களோ என்ற, 'டவுட்'தான் வருது!

பத்திரிகை செய்தி: பா.ஜ., தலைமையிலான தேசிய ஜனநாயக கூட்டணியில் இணைந்தால், தன் தரப்பினர் போட்டியிடும் தொகுதிகளில் தேர்தல் பணிகளை பார்க்காமல், அ.தி.மு.க.,வினர் தோற்கடித்து விடுவர் என அச்சப்பட்டு, அக்கூட்டணியில் இணைய முன்னாள் முதல்வர் பன்னீர்செல்வம் தயக்கம் காட்டுவதாக, தகவல்கள் வெளியாகி உள்ளன.

டவுட் தனபாலு: அவர் தயங்குவதிலும் அர்த்தம் இருக்கு... பன்னீர்செல்வம் அணியினர் ஜெயித்து வந்தால், துணை முதல்வர், அமைச்சர் பதவிகள் கேட்டு தொந்தரவு பண்ணுவாங்க என்பதால், தேர்தல் களத்திலேயே, அவங்க காலை வாரிவிட அ.தி.மு.க., வினர்காத்துட்டு இருப்பாங்க என்பதில், 'டவுட்'டே இல்லை!