டவுட் தனபாலு: உங்க கட்சியின் பலம் மட்டும் இல்லை என்றால், தி.மு.க., அணி ஜெயிப்பதே கேள்விக்குறியாகிடும்னு நினைக்கிறீங்களோ... 'நெனப்பு தான் பொழப்பை கெடுத்துச்சாம்' என்ற பழமொழிக்கு சரியான உதாரணம் நீங்கதான் என்பதில், 'டவுட்'டே இல்லை!

lll

கேரள மாநில பா.ஜ., தலைவர் ராஜீவ் சந்திரசேகர்: நம் பார்லிமென்டில் இருக்கும் போது, வடகொரிய பார்லிமென்டில் இருப்பது போல் உணர்வதாக, காங்., - எம்.பி., ஜெய்ராம் ரமேஷ் தெரிவித்தது கண்டனத்துக்குரியது. நம் பார்லிமென்டின் மதிப்பை அவர் கெடுக்கிறார். வட கொரியாவில் வாழ விருப்பம் இருந்தால், ஜெய்ராம் ரமேஷ், லோக்சபா எதிர்க்கட்சி தலைவர் ராகுலுக்கு, நானே விமான டிக்கெட் எடுத்து தருகிறேன்.

டவுட் தனபாலு: வடகொரிய பார்லிமென்ட் பற்றிய பேசியது, ஜெய்ராம் ரமேஷ் தானே... அவருக்கு மட்டும் டிக்கெட் எடுத்து, வடகொரியாவுக்கு அனுப்புறதை விட்டுட்டு, ராகுலையும் கோர்த்து விடுவது ஏன்... ஒரு டிக்கெட் எடுத்தால் இன்னொரு டிக்கெட் இலவசம் என்ற சலுகையில், ராகுலை நாடு கடத்த பார்க்கிறீங்களோ என்ற, 'டவுட்'தான் வருது!

lll

ஆம் ஆத்மி கட்சியின் தமிழக தலைவர் வசீகரன்: 'இண்டி' கூட்டணியில் இருக்கும் எங்களுக்கு, இந்த முறை சட்டசபை தேர்தலில் தி.மு.க., ஒரு வாய்ப்பு தரும் என நினைக்கிறோம். டில்லி முன்னாள் முதல்வர் அரவிந்த் கெஜ்ரிவால் மற்றும் பஞ்சாப் முதல்வரை பிரசாரத்துக்கு அழைத்து வருவேன். எங்கள் உயரத்துக்கும், தகுதிக்கும் ஏற்ற அங்கீகாரத்தை எதிர்பார்க்கிறோம்.

டவுட் தனபாலு: தமிழகத்தில் இருக்கிற கூட்டணி கட்சிகளுக்கு, தொகுதிகள் ஒதுக்குறதுக்குள்ளயே தி.மு.க.,வினருக்கு நாக்கு தள்ளிடுச்சு... இதுல, நீங்க வேற குறுக்கே புகுந்து காமெடி பண்றீங்களே... அரவிந்த் கெஜ்ரிவால், பஞ்சாப் முதல்வர்னு இல்லை... நீங்க, அமெரிக்க அதிபர் டிரம்பையே பிரசாரத்துக்கு அழைச்சிட்டு வந்தாலும், உங்க கட்சிக்கு இதயத்தில் மட்டும் தான் தி.மு.க.,வினர் இடம் தருவாங்க என்பதில், 'டவுட்'டே இல்லை!

lll