டவுட் தனபாலு: 'உதயநிதி முதல்வராகிறப்பவும் நான் அமைச்சராக இருப்பேன்'னு ஏற்கனவே நீங்க சொல்லியிருக்கீங்க... அந்த வகையில், 'இது எனக்கு கடைசி தேர்தல் இல்லை... அடுத்தடுத்த தேர்தல்களிலும் போட்டியிடுவேன்... இளைஞர்களுக்கு வழிவிடவே மாட்டேன்'னு சொல்ல வர்றீங்களோ என்ற, 'டவுட்'தான் வருது!

தமிழக முதல்வர் ஸ்டாலின்: புதுச்சேரியை நாசமாக்கியுள்ள காவிப் படையை விரட்டியடிக்க வேண்டும். பா.ஜ., கூட்டணியில் இருக்கும் புதுச்சேரி முதல்வர் ரங்கசாமிக்கு, பீஹார் முதல்வர் நிதிஷ்குமார் நிலைதான் வரும். தனக்கு தெரிந்த ரூட்டில் ரங்கசாமியை எப்போது, எப்படி கவிழ்க்கலாம் என, பா.ஜ., சிந்திக்கிறது. இது ரங்கசாமிக்கும் தெரியும்; அவரும் சாமானியப்பட்டவர் இல்லை.

டவுட் தனபாலு: பீஹாரில், தே.ஜ., கூட்டணி ஜெயித்து ஆட்சிக்கு வந்த பிறகு தான், நிதிஷ்குமாரிடம் இருந்து, முதல்வர் பதவியை பெறும் முடிவை பா.ஜ., எடுத்தது... அந்த வகையில், 'புதுச்சேரி சட்டசபை தேர்தலில், தி.மு.க., - காங்., கூட்டணி தேறாது; தே.ஜ., கூட்டணியே மீண்டும் ஜெயித்து, ரங்கசாமிதான் முதல்வர் ஆவார்'னு சொல்லாம சொல்றீங்களோ என்ற, 'டவுட்' வருதே!

லோக்சபா எதிர்க்கட்சி தலைவர் ராகுல்: புதுச்சேரியில் கவர்னரை வைத்து, 'ரிமோட் கன்ட்ரோல்' மூலம், பா.ஜ.,வே ஆளுகிறது. பா.ஜ.,வினர், புதுச்சேரிக்கு மாநில அந்தஸ்து கொடுக்கவில்லை; நாங்கள் புதுச்சேரிக்கு மாநில அந்தஸ்தை கொடுப்போம். புதுச்சேரியை மக்கள் ஆள வேண்டும்; கவர்னர் அல்ல. எனவே, மாநில அந்தஸ்தை பெற்று தர, காங்., மற்றும் கூட்டணி கட்சி வேட்பாளர்களை மக்கள் ஆதரிக்க வேண்டும்.

டவுட் தனபாலு: தேசிய அளவிலும், புதுச்சேரியிலும், 50 ஆண்டுகளுக்கும் மேலாக உங்க கட்சிதான் ஆட்சியில் இருந்துச்சு... அப்ப எல்லாம், புதுச்சேரிக்கு மாநில அந்தஸ்து வழங்காம, துாக்கத்துல இருந்துட்டு, இப்ப தேர்தலுக்காக, 'மாநில அந்தஸ்து' என்ற உங்க வாக்குறுதியை, புதுச்சேரி மக்கள் நம்புவாங்களா என்பது, 'டவுட்'தான்!