த.வெ.க.,வின் நிர்வாக குழு தலைமை ஒருங்கிணைப்பாளர் செங்கோட்டையன் பேட்டி: ' விஜய் வேட்பு மனுவில், 100 கோடி ரூபாய் சொத்து மதிப்பை குறைத்து காண்பித்தது முறைகேடு' என, உயர் நீதிமன்றம் கூறியுள்ளதாக பலரும் விமர்சிக்கின்றனர். யார் வேண்டுமானாலும், என்ன கருத்து வேண்டுமானாலும் கூறலாம். ஆனால், விஜயை பொறுத்த வரை துாய்மையான மனிதர்.

இறக்குமதி செய்த வெளிநாட்டு காருக்கு வரி கட்டாமல், 'டிமிக்கி' கொடுத்துட்டு, ஐகோர்ட்டில் குட்டு வாங்கிய விஜய் துாய்மையான மனிதரா?

வி.சி., கட்சி தலைவர் திருமாவளவன் பேச்சு: நடிகர் விஜய் மீது நமக்கு ஒன்றும் காழ்ப்புணர்ச்சி கிடையாது. அவர் பேச்சில் எந்த கொள்கையும், கோட்பாடும் கிடையாது. தனது கொள்கை தலைவர்கள் என விஜய் கூறுபவர்களை பற்றி ஏதாவது பேசி இருக்கிறாரா; எதுவும் இல்லை. அ.தி.மு.க., பொதுச்செயலர் பழனிசாமி, பா.ஜ.,வுடன் கூட்டணி வைத்ததற்கு நியாயமான ஒரு காரணத்தை சொல்ல முடியுமா?

தி.மு.க., ஆட்சியில், பட்டியல் சமூக மக்களுக்கு எதிராக பல சம்பவங்கள் நடந்தும், அந்த கூட்டணியில் இவர் நீடிப்பதற்கு நியாயமான காரணத்தை சொல்வாரா?

பா.ஜ.,வை சேர்ந்த, மத்திய பிரதேச முதல்வர் மோகன் யாதவ் பேட்டி: தமிழகத்தில் இரும்பு பெண்மணியாக திகழ்ந்த ஜெயலலிதாவை போல், மேலும் பல பெண்கள் அரசியலுக்கு வர வேண்டும் என்ற நோக்கில், பார்லிமென்டில், 33 சதவீத மகளிர் இடஒதுக்கீடு மசோதாவை, பிரதமர் மோடி கொண்டு வந்தார். ஆனால், சாதாரண பெண்கள் அதிகாரத்திற்கு வருவதை, தி.மு.க., மற்றும் காங்., கட்சிகள் விரும்பாமல் தடுத்து நிறுத்தி விட்டன. தி.மு.க., - காங்., ஆகிய இரு கட்சிகளும் குடும்ப ஆட்சி நடத்தி வருகின்றன. இவர்கள், வேறு யாரும் அரசியலுக்கு வந்துவிடக்கூடாது என்பதில் குறியாக உள்ளனர்.

அவங்க குடும்ப அரசியல் நடத்தினாலும், தன் சகோதரி பிரியங்காவின் முன்னேற்றத்தை ராகுலும், கனிமொழியின் உயர்வை முதல்வர் ஸ்டாலினும் முடக்கிதானே வச்சிருக்காங்க!