PUBLISHED ON : ஏப் 20, 2018

அன்புள்ள ஆன்டிக்கு...
எட்டாம் வகுப்பு மாணவி எழுதுவது. இந்தப் பகுதியை தொடர்ந்து படிப்பேன் ஆன்டி. அதனால், என்னுடைய கவலையை, உங்களிடம் கொட்டப் போகிறேன்.
டாடின்னா, எனக்கு ரொம்ப உயிர்; எனக்கொரு தங்கை உண்டு; அம்மா, வீட்டை பார்த்துக்குவாங்க... எங்க டாடி, குடும்பத்துக்காக ரொம்ப உழைக்கிறார்... அவருக்கு, இரவில் தூக்கமே வருவதில்லை... ரொம்ப கஷ்டப்படுறார்.
கடன் பிரச்னை, பணப் பிரச்னை உண்டு... எங்களது எதிர்காலம் குறித்து, ரொம்ப கவலைப்படுறார்.
இதனால், தூக்கம் வரலையான்னு தெரியல ஆன்டி... கண்ணுக்கு கீழ, கருவளையம் வந்து, அசிங்கமா இருக்கு...
நீங்க தான், எல்லாப் பிரச்னைக்கும் வழி சொல்றீங்களே... ஏதாவது, எளிய வழிமுறை சொல்லுங்க ஆன்டி... எங்க டாடிக்கு செய்து கொடுத்து, தூங்க வைக்கிறேன்.
ஹாய் டியர்... உன்னோட டாடி பாசம் புரியுது... இந்த காலத்துல, பல பேர் இந்த பிரச்னையால கஷ்டப்படுறாங்க செல்லம். தற்போதைய உணவு முறை, அதிகப்படியான டென்ஷன், வேலை பளு, மொபைல் போன், 'டிவி' பார்த்தல், மது அருந்துதல், இரவு நேர வேலை என, பல காரணங்கள் தூக்கமின்மைக்கு காரணம்.
மனச்சோர்வும் தூக்கத்தைக் கெடுக்கும். சராசரி மனிதனின் ஆரோக்யத்திற்கு, ஆறு முதல், ஏழு மணி நேர தூக்கம் அவசியம்; அப்போது தான், நம் மூளை, சுறுசுறுப்பாக வேலை செய்யும்.
தூக்கமின்மையால், ஞாபக மறதி, மன உளைச்சல், நரம்பு தளர்ச்சி, புற்றுநோய் போன்றவை உருவாகின்றன.
நல்ல துாக்கம் வர...
* மாலை, 7:00 மணிக்கு பிறகு, டீ, காபி, தண்ணீர், குளிர் பானம் அருந்தக் கூடாது
* மிதமான வெந்நீரில் குளித்து, பூண்டு போட்ட, சூடான பால் அருந்தி விட்டு, துாங்கச் சென்றால், சுகமான துாக்கம் வரும்
* கசகசா, மாதுளம் பழம், பால் இவை நல்ல தூக்கத்தை கொடுக்கும். 1 ஸ்பூன் கசகசாவை, 1 மணி நேரம் ஊற வைத்து, அரைத்து, 1 ஸ்பூன் தேன் கலந்து, படுப்பதற்கு, 1 மணி நேரத்திற்கு முன்பு குடித்து வர, நல்ல துாக்கம் வரும்
* கடுகு எண்ணெயை சூடு செய்து, உள்ளங்காலில் தேய்த்து விட்டு படுத்தால், நல்ல தூக்கம் வரும்
* பாகற்காய் சாற்றில், சிறிது நல்லெண்ணெய் கலந்து, உச்சந்தலையில் தேய்த்து, தூங்கச் செல்லலாம்.
கடைசியாக, பாட்டி வைத்தியம் ஒன்று சொல்கிறேன்...
ஒரு பல் பூண்டை தலையணைக்கு அடியில் வைத்து, தூங்கினால், நல்ல தூக்கம் வரும். இதில், எந்த வழி உன் டாடிக்கு ஒத்து வருது என்று, 'ட்ரை' பண்ணி பாரு!
உன் டாடி சுகமாக தூங்கி, நலம் பெற வாழ்த்துகள்!
தூக்கம் என் கண்களை தழுவுகிறது... ஆவ்... ஆவ்...
- ஜெ...னி...ப...ர்... பி...ரே...ம்.!
