'சொர்க்கமே என்றாலும், அது, நம்ம ஊரைப் போல வருமா?' என்ற பழமொழி, எதற்கு பொருந்துமோ இல்லையோ, சாப்பாட்டு விஷயத்தில் கண்டிப்பாக பொருந்தும். அமெரிக்கா, ஆஸ்திரேலியா என, வெளிநாடுகளில் தங்கி, கிடைத்ததை சாப்பிட்டு, காய்ந்து போய் இருப்பவர்களுக்கு... 'ப்ரை' செய்த, 'ஸ்பைசி'யான, காரசாரமான, அசத்தலான அயிட்டங்கள் கண்ணில் பட்டால்... அதுவும், சமையலுக்கு பெயர் பெற்ற, செட்டிநாடு சமையல் கிடைத்தால், ஒரு பிடி பிடித்துவிட மாட்டார்களா!

அப்படித்தான், நியூயார்க்கில் வசிக்கும் நம்மவர்கள், இத்தகைய உணவை சாப்பிடுவதற்கு, ஓடோடி செல்கின்றனர். எங்கு தெரியுமா? அமெரிக்காவில், நியூயார்க் நகரில் உள்ள, அஞ்சப்பர் ஓட்டலுக்கு தான்.

தமிழ்நாட்டில் மட்டுமல்லாமல், இந்தியா முழுக்க, பல கிளைகளை கொண்ட இந்த ஓட்டல், அமெரிக்கா, ஐக்கிய அரபு எமிரேட், மலேசியா, இலங்கை, சிங்கப்பூர் ஆகிய நாடுகளிலும், தற்போது பிரபலமடைந்துள்ளது. இதற்கு காரணம், பாரம்பரியமான செட்டிநாடு உணவு வகைகளை, அதன் சுவை மாறாமல் தயாரித்து வழங்குவது தான்.

நியூயார்க்கில் உள்ள அஞ்சப்பர் ஓட்டலின் உள் அலங்கார வேலைப்பாடுகள், பிரமிக்க வைக்கும் வகையில் உள்ளன. மேஜை மீது விரிக்கப்பட்ட வெள்ளைத் துணி, கண்களை உறுத்தாத தொங்கும் சர விளக்குகளின் வெளிச்சம், சித்திர வேலைப்பாடுகளுடன் கூடிய தட்டுகள் என, சிவப்பு நிற பின்னணியில் அசத்தலாக காட்சி அளிக்கிறது.

வெஜிடபிள் குருமா, கத்தரிக்காய் குழம்பு, பூண்டு குழம்பு, குழிப்பணியாரம், சமோசா, கோழி, நண்டு, ஆட்டு எலும்பு சூப், சிக்கன் லாலிபாப், இறால் 65, மீன் 65, மிளகு சிக்கன், இறால் பக்கோடா, தந்தூரி சிக்கன், சிக்கன் டிக்கா என, நாக்கை சப்புக் கொட்ட வைக்கும் சுவையான உணவு வகைகள், சுடச் சுட இங்கு பரிமாறப்படுகின்றன.

நம்மவர்களை விட, அங்குள்ள வெள்ளையர்கள், இந்த உணவு வகைகளை சாப்பிட அலைமோதுகின்றனர்.

செட்டிநாடு ஸ்பெஷலான சிக்கன் பிரியாணியின் ஒவ்வொரு பருக்கையிலும், சுவை எட்டிப் பார்க்கிறது. அஞ்சப்பர் ஓட்டலில் ஆப்பம் சாப்பிடுவதற்கென, நியூயார்க்கில் ஒரு ரசிகர் பட்டாளமே உருவாகியுள்ளது. ஆப்பத்திற்கு, 'சைடிஷ்' ஆக, தேங்காய்ப் பாலும், சர்க்கரையும் கிடைக்கிறது.

செட்டிநாடு சமையலில், மற்ற எதிலும் இல்லாத ஒரு நறுமணம் நிறைந்து இருக்கும். குறிப்பாக, இறைச்சி உணவு சமைக்கும் போது பயன்படுத்தும், மராத்தி மொக்கு, அன்னாசிப்பூ, கல்பாசி, லவங்கம், ஏலக்காய், பிரிஞ்சி இலை போன்ற வாசனைப் பொருட்கள் சேர்த்து அரைக்கப்படும் மசாலாவே இதற்கு காரணம்.

இனிமேல், அமெரிக்காவுக்கு... குறிப்பாக, நியூயார்க்கிற்கு சென்றால், நம்மூர் உணவு கிடைக்கவில்லையே என வருந்தாமல், அஞ்சப்பர் ஓட்டலுக்கு சென்று ஒரு பிடி பிடித்துவிட்டு வாருங்களேன்!

***

ஆஞ்சலா ராஜம்