PUBLISHED ON : செப் 25, 2016

செப்., 30 மகாளய அமாவாசை
ஆடி மற்றும் தை மாதங்களில் வரும் அமாவாசைகளை விட, புரட்டாசியில் வரும் மகாளய அமாவாசையே முக்கியமானது. நம் முன்னோர் ஒட்டுமொத்தமாக பூமிக்கு வரும் நாள் இது. இந்நாளில், திருவாரூர் அருகிலுள்ள, செதலபதி முக்தீஸ்வரர் கோவிலில், தர்ப்பணம் செய்வது சிறப்பானது. மேலும், இங்கே, தினமும் அமாவாசை தர்ப்பணம் நடைபெறும்.
ராமபிரானின் வனவாச காலத்தில், அவரது தந்தை தசரதர் இறந்து விட்டார். அவரால், தந்தைக்கு இறுதிச்சடங்கு செய்ய முடியவில்லை. அதனால், வனவாசத்திற்கு பின், சிரார்த்தம் செய்வதற்காக, திருவாரூர் அருகிலுள்ள, செதலபதிக்கு வந்தார். இங்குள்ள அரசலாற்றில் நீராடி, பிண்டம் வைத்து, சிரார்த்தம் செய்தார்.
மேலும், வனவாச காலத்தில், ராவணனுடன் போராடி, உயிர் விட்ட ஜடாயுவுக்கு மரியாதை தரும் விதமாக, எள் வைத்து, பிதுர் தர்ப்பணம் செய்தார். எனவே இவ்வூர், 'திலதர்ப்பணபுரி' என்று பெயர் பெற்றது. 'திலம்' என்றால், எள்.
ராமர் தர்ப்பணம் செய்த போது மாதா, பிதா, குரு, தெய்வம் ஆகிய நால்வரையும் வணங்கி, நான்கு பிண்டங்கள் பிடித்து வைத்து பூஜித்தார்; இந்த பிண்டங்கள், லிங்கங்களாக மாறின. மூலஸ்தானத்திற்கு பின்புறத்தில், இந்த லிங்கங்களையும், தர்ப்பணம் செய்த ராமரையும் காணலாம். இவர், வலது காலை மண்டியிட்டு, வடக்கு நோக்கி உள்ளார். ராமரின் இத்தகைய தரிசனத்தை காண்பது அபூர்வம்.
மகாபாரத யுத்தத்தின் போது, பாண்டவர்களுக்கு உதவும் பொருட்டு, அமாவாசையை அவசரமாக உருவாக்க, ஒரு தந்திரம் செய்தார் கிருஷ்ணன். அமாவாசைக்கு முந்திய சதுர்த்தசி திதியன்றே, தர்ப்பணம் செய்யும்படி துறவிகள் சிலரிடம் கூறினார். அவர்களும் அவ்வாறே செய்ய, அது கண்டு குழம்பிய சூரியனும், சந்திரனும் பூலோகம் வந்து, கிருஷ்ணரிடம், 'சதுர்த்தசியன்றே தர்ப்பணம் கொடுக்கச் சொல்லியுள்ளீர்களே... நாங்கள் இருவரும் இணையும் நாள் தானே அமாவாசை...' என்றதும், 'இப்போது இணைந்து தானே வந்துள்ளீர்கள்...' என, சமயோசிதமாக பதிலளித்தார், கிருஷ்ணன்.
செதலபதி முக்தீஸ்வரர் கோவிலில் சூரியனும், சந்திரனும் அருகருகே உள்ளனர். இங்கே இவர்கள் நிரந்தரமாக இணைந்திருப்பதால், இக்கோவிலில் தினமும் அமாவாசையாக கருதப்படுகிறது. இதனால், இதை, 'நித்ய அமாவாசை' கோவில் என்பர். இக்கோவிலில் முன்னோர்களுக்கு பிதுர் தர்ப்பணம் செய்ய அமாவாசை, திதி, நட்சத்திரம் என பார்க்கத் தேவையில்லை. எந்த நாளில் வேண்டுமானாலும் சிரார்த்தம், தர்ப்பணம் செய்யலாம்.
முன்னோர்களுக்கு தர்ப்பணம் செய்ய காசி, ராமேஸ்வரம், திருவாரூர் மாவட்டம் ஸ்ரீவாஞ்சியம், நாகப்பட்டினம் மாவட்டம் திருவெண்காடு, செதலபதி, கயா மற்றும் அலகாபாத்தில் உள்ள திரிவேணி சங்கமம் ஆகிய ஏழு தலங்கள், சிறந்த தலங்களாக கருதப்படுகிறது. இதில், ஐந்தாம் இடத்தில் உள்ள தலம் இது!
இங்கே விநாயகர், மனித முகத்துடன் மேற்கு பார்த்து இருக்கிறார். விநாயகருக்கு யானை முகம் வருவதற்கு முன் உள்ள பழம்பெரும் வடிவம் என்பதால், இவரை, 'ஆதி விநாயகர்' என்று அழைக்கின்றனர். கோரிக்கைகள் நிறைவேற, இவரது சன்னிதியில் மட்டைத் தேங்காய் கட்டி வழிபடுகின்றனர்.
இங்குள்ள பொற்கொடி அம்பாளுக்கு குழந்தை மற்றும் மாங்கல்ய பாக்கியம் வேண்டி அர்ச்சனை செய்கின்றனர். மயிலாடுதுறை செல்லும் வழியில், திருவாரூர் சாலையில் உள்ள பூந்தோட்டம் கிராமத்தில் இருந்து, 2 கி.மீ., தூரத்தில் உள்ளது, செதலபதி. முன்னோர் ஆசி பெற, செதலபதி சென்று, தர்ப்பணம் செய்து வாருங்கள்.
அலைபேசி: 94427 14055.
தி.செல்லப்பா
