PUBLISHED ON : டிச 26, 2010

* வருத்தப்படவில்லை மகனே...
உன் சொல்லும், செயலும்
நியாயமானது... சரியானது...
* உலகம் ஆயிரம் சொல்லட்டும்...
உற்றார் உறவினர் எப்படியும்
ஏசட்டும்... கவலைப்படாதே...
* மனக்கசப்புடன் மருமகள்...
ஒட்டாத பேரன், பேத்திகள்
இனியும் உழைக்க
ஒத்துழைக்காத உடம்பு...
* திண்ணையும், புல் தரையும்
காணாமல் அகதியாய்
அடுக்குமாடிக் குடியிருப்பில்
நகரத்து நரக வாழ்க்கை...
* இவை எதுவுமின்றி இப்போது
நலமாய் இருக்கிறேன் மகனே...
உனக்கு நன்றி
சொல்லத்தான் வேண்டும்...
* மழை, வெயில் தெரியாத இருப்பிடம்...
வேளா வேளைக்கு உணவு...
வேலையின்றி அமைதியான ஓய்வு...
நல்லதொரு வயதான நட்பு வட்டம்...
* பொழுது போக
பூஜை... பஜனை...
தாராள மருத்துவம்...
இன்னும் என்ன குறை எனக்கு?
* நீ மட்டும் வாரம் ஒருமுறை
குடும்பத்துடன் வந்து முகம் காட்டு...
உள்ளபடியே நான் மகிழ்வுடன்
இருக்கிறேன் இந்த
முதியோர் இல்லத்தில்!
— சொல்கேளான் ஏ.வி.கிரி, சென்னை.
