PUBLISHED ON : ஜூன் 10, 2012

காதலுக்காகவாவது...
* ஒரு தோழனாய்
உன்னைவிட்டு வந்தாலும்
இப்போதெல்லாம்
என் இருப்பிடம்
வந்து சேர இயலவில்லை என்னால்...
நிஜத்தை விட்டுவந்த
நிழல்போல!
* சிறு பறவை
பறந்து போனதற்காக
வருந்துவதா
அது பறக்கக்
கற்றுக் கொண்டதற்காக
மகிழ்வதா என்று
பரிதவிக்கிற
தாய்ப்பறவையாய்
பரிதவிக்கிறேன்...
உன்னுடனான நட்பு
காதலாக மாறிவிட்ட இன்று!
* நட்பை காரணம் சொல்லி
காதலை இழக்க துணிகிறாய்...
வாழ்வை இழந்து விடுவோமோ என்று
நான் பயப்படுகிறேன்!
* எல்லா நதிகளையும் உள்வாங்கி,
கடலென உருமாறி நிற்கும்
பெருவெளியைப் போல
உன் நேசத்தை மட்டுமல்ல
கோபங்களையும்
உள்வாங்கித்தான்
காதலாய் உருமாறி நிற்கிறேன்!
* நாம் இருவரும்
பேசிக் கொள்வதில்லை...
இதை விட வேறென்ன வேண்டும்
ஒருவரையொருவர்
புரிந்து கொண்டதற்கு!
* எனக்காக வேண்டாம்...
ஆசையில்லாமல் வாழ்வதற்கேனும்
ஆசை ஒன்று இருப்பது போல
காதலுக்காகவாவது
காதலித்துப் பாரேன்!
* தெரியுமா உனக்கு...
நட்புக்குள்
காதல் இல்லை என்றாலும்
காதலுக்குள்
நட்பு உண்டென்பது?
— என்.ரமேஷ், கொளத்தூர்.
