எங்கே போயிற்று, பெண் விடுதலை!

* எங்கே போயிற்று பெண் விடுதலை?

எங்கே போயிற்று பெண் விடுதலை?

அது...

தொலைந்து போன அந்த பெண்ணிடமே

தேடுங்கள்!

* நாகரிக மோகத்தில்

நம்முடைய

கலாசாரத்தை அழித்த

நங்கைகளிடமே தேடுங்கள்!

* நெற்றி திலகமிட்டு

கருங்கூந்தல் சீவி

மலர் சூட்டி

அழகு பார்த்த தாயின் எதிரில்,

கருங்கூந்தல் கத்தரித்து

நாகரிக உடையில்

நளினமாய் திரியும்...

நங்கைகளிடம் தேடுங்கள்!

* அதிகாலையில்

புதுப்புனலாடி

நளினமாய் மாக்கோலமிட்டு

வீட்டில் குத்து விளக்கேற்றும்

நிலைமாறி...

அதிகாலையிலிருந்து

இரவு வரை

அலைபேசியும், கையுமாகத்

திரியும்

நங்கைகளிடம் தேடுங்கள்!

* வேறு ஆடவர் முகம் பார்க்க

நாணி கோணி

கால்களால் கோலம் வரையும்

நிலைமாறி...

நட்பு எனும் பெயரில்

ஆடவர்களுடன் ஊர் சுற்றும்

நங்கைகளிடம் தேடுங்கள்!

* 'இவர் தானடி

உன் மணாளன்'

என்று கூறிய நிலைமாறி...

கல்விச் சாலை

செல்லும் போது திருமணம்

முடிவதற்குள் விவாகரத்து

என்று திரியும்

நங்கைகளிடம் தேடுங்கள்!

* ஐயகோ...

பாரதியே இதை பார்த்தால்

கொதித்தெழுவார்...

உனக்கேனடி விடுதலை;

உனக்கா நான் வாங்கித் தந்தேன் விடுதலை...

என்று பித்தானக மாறி பிதற்றுவான்!

* பெண்ணே...

வாங்கித் தந்த விடுதலை

தன்னம்பிக்கையை உயர்த்தி

வீட்டில் குத்து விளக்கு ஏற்றத்தானே

ஒழிய...

வீட்டை கொளுத்தும்

கொள்ளியாக்க அல்ல!

* வாங்கிய விடுதலையை

வீணாக்காதே...

மீண்டும்

மூலையில் முடங்காதே!

— டி.பத்மப்ரியா சாந்தகுமார்.