காலம் மாறித்தான் போச்சு!

* கூண்டு வண்டிக்குள்

எழுந்து நின்ற நிலைமாறி

இன்று கூகுளுக்குள்

கை குலுக்குகின்றனர்

மாமனாரும் - மருமகளும்!

* கொல்லையில் உரல்கள்

பல கிடக்க, பத்து ரூபாய்

கொடுத்து உரலில் மாவரைத்து

பார்க்கின்றனர் - என் மருமக்கள்

'தட்ஷன் சித்ரா'வில்

* பாட்டியின் அன்பு ஸ்பரிசமின்றி

பாட்டி சொன்ன கதைகளை

ரசிக்கின்றனர் - பேரக்குழந்தைகள்

பாட்டுடன் கதை சொல்லும்

ஒலி தகட்டில்!

* தொப்புள் கொடி தாயத்தில்

அடைத்தது போக

இன்று பிறந்த குழந்தை

தன்முதல் சேமிப்பு கணக்கை

தொடங்குகிறது ஸ்டெம்செல்

வங்கியில்!

* கூட்டு குடும்பத்தில்

குஷியாக இருந்த முதியவரை

கூவி கூவி அழைக்கின்றன

முதியோர் காப்பகங்கள்!

* சிட்டுக்குருவி கூட எங்கோ

போய்விட்டது

சிறகு விரிக்க மனமின்றி

அதற்கும் ஒரு வருத்தம்

நம்மை நேசித்த மனிதர்கள்

யோசிக்க மறந்து விட்டனரே!

* விஞ்ஞான முன்னேற்றம்

பிரமிக்க வைக்கிறது!

உறவுகளின் தடுமாற்றம்

யோசிக்க வைக்கிறது!

— சங்கமித்ரா, நெல்லை.