உனக்காக ஓர் இதயம்....

* மறுபடியும் உன்

சந்திப்புகளோ

உரையாடல்களோ

கடைக்கண் பார்வைகளோ

நிகழாத வரை

நின்று போகாது என்

நிகழ்காலம்!

* நம்மிடை

சிறகடிக்கும் கனவுகளையும்,

கரம் பிடிக்கும் ஆசைகளையும்

வார்த்தை முற்றுப்புள்ளிகளால்

இறகொடித்து வழியெங்கும்

தூவிக்கொண்டு

முன்னோக்கி நகர்கிறாய்!

* என்ன செய்வது?

வீதியெங்கும் சிதறிய

புள்ளிகளின் தடைகளாய்

பின்னோக்கி நகர்கின்றன நம்

காதலும், சந்தோஷமும்!

* ஒரு வேளை நீ

காகக்கூட்டில்

முட்டையிடும் குயில்கள் போல

காத்திருக்கலாம் அல்லது

தொட்டி மீனின்

நீந்தும் இலக்குகளுக்காக

பறந்து விரியும் வானின்

எல்லைகளை நீ

விரும்பாதிருக்கலாம்!

* இல்லை...

ஓடு மீன் ஓட

உறு மீனுக்காகவும்

காத்திருக்கலாம்!

* எது எப்படியோ...

சுற்றும் இந்த பூமியில்

நம் சந்திப்புகள்

என்றாவதொரு நாள்

நிகழாமலா போகும்!

* அப்போது நிஜங்கள் நிச்சயம்

உன்னைக் கைது செய்யும்!

* மனம் பிடுங்கி

மனம் கொன்றவருக்கு

தண்டனை

மன்னிப்பாகவும் இருக்கலாம்.

மறுப்பதிற்கில்லை.

குற்றவுணர்வுகளின் பிடியில்

குலையறுந்து

குற்றுயிராகப் போகலாம்...

தடுப்பதும் சாத்தியமில்லை!

* அப்போதும் கூட

உனக்காகத் துடிக்க

எப்போதும் ஓரிதயம்

என்னிடமிருக்கிறது

புரிந்து கொள் அன்பே...

வாழ்வின் தொடக்கப்புள்ளி

புரிதலின் ஆரம்பத்தில் தான்

புதைந்திருக்கிறது!

— 'செல்லம்' ரகு, திருப்பூர்.