PUBLISHED ON : அக் 27, 2013

தீபஒளி ஏற்றிடுவோம்!
* கங்கா ஸ்நானம் செய்து
புத்தாடை உடுத்தி
பலகாரங்களை உண்டு
பட்டாசு வெடித்தலே
தீபாவளி நன்னாள் எனும்
நினைப்பை கொளுத்துவோம்!
* ஒலியால் செவிக்கும்
ஒளியால் விழிக்கும்
பாதிப்புண்டாக்கும்
பட்டாசுகளை வெடிப்பதால்
கரியாவது காசு மட்டுமல்ல...
வளி மண்டலமும் தான்!
* ஓசோன் ஓட்டையாலும்,
'குளோபல் வார்மிங்'காலும்,
கொதிக்கும் வெப்பத்தில்
கந்தகப்புகை கலந்து
நச்சாக்கிடும் வேலையை
அறவே நசுக்கிடுவோம்!
* புத்தாடையின் திருப்தி
நாம் அணிவதில் மட்டுமல்ல...
வறியவர்களுக்கு வழங்குவதிலுமுள்ளது
அவர்களின் வாழ்த்துகளையே
புத்தாடையாய் அணியப் பழகுவோம்!
வசதியற்றவர்களோடு பலகாரங்களை
பகிர்ந்து கொள்வோம்...
வயிறு நிறைந்து
வாயார வாழ்த்துவதையே
இனிப்பாய் உண்போம்!
* தீபாவளி பெயரால்
ஆடம்பரமாய் செலவிடும்
பட்டாசுக்கான பணத்தை
ஆதரவற்றவர்களுக்கு
உடையாய், உணவாய் வழங்கிடுவோம்!
அவர்களின் நன்றி வாழ்த்தொலியையே
பட்டாசொலியாய்
பாவித்து மகிழ்வோம்!
* அரக்கன் அழிவை
ஆர்ப்பாட்டமாய் கொண்டாடுதலுக்கு
பதிலாக, ஏழைகளுக்குதவிடுவோம்
அவர்கள் வாழ்வில்,
'தீப ஒளி' ஏற்றிடுவோம்!
— எஸ்.சங்கர், திருப்பரங்குன்றம்.
