குழந்தைகள் கிழிக்காத புத்தகங்கள்!

* பச்சை மண்ணில்

பாத்திரங்கள் செய்து,

இச்சையோடு விளையாடும்

கூட்டாஞ்சோறு!

* கட்டங்களுக்குள்

நொண்டியடித்து,

களிப்போடு விளையாடும்

சில்லு!

* வண்ண வண்ண காகிதங்களால்

அலங்காரம் செய்து,

ஆசை மனங்களைப் போல்

ஆகாயத்தில் பறக்கவிடும்

பட்டம்!

* எட்டுத் திக்கும்

சிட்டாய் பறக்கும்

கோட்டிப் புல்!

* அறிவை விருத்தி செய்து

ஆனந்தத்தையளிக்கும்

ஆடு புலி ஆட்டம்!

* கண்ணுக்கும், கழுத்துக்கும்,

கைகளுக்கும் உடற்பயிற்சியாய்

அஞ்சாங்கல்!

* இந்தக் குழியை அள்ளினால்

இத்தனை காய்கள் கிடைக்குமென்று,

வாழ்வின் திட்டமிடுதலை

வலியுறுத்தும் பல்லாங்குழி!

* வேர்வையை வெளியேற்றி,

தசை நார்களை வலுப்படுத்தும்

கோலாட்டம், கும்மி, சடுகுடு!

* இந்த அற்புத

பாரம்பரிய விளையாட்டுகளை

மறந்து விட்டு,

கிழித்துப் போட்ட புத்தகங்களாய்

இன்றைய குழந்தைகள்!

* மாற்றுவோம்...

குழந்தைகளை மட்டுமல்ல

பாட திட்டங்களையும்!

— தேன் தமிழன்,நெய்வேலி.