முயற்சிப்போம்!

விடா முயற்சிக்கும்,

வீண் முயற்சிக்கும்

ஓரெழுத்து தான் வித்தியாசம்

முயற்சிக்க முயற்சிப்போம்!

பலம் எது பலவீனம் எது

புரிந்து கொள்ள

இரண்டாவதாக

முயற்சிக்க வேண்டும்!

எதுவாக நினைக்கிறாயோ

அதுவாக மாறுவாய்...

அறிஞர்கள் சொன்னது

அதற்காக,

ஆண்கள் சூரியனாகவும்,

பெண்கள் நிலவாகவும்

ஆக முயற்சிக்கலாமா!

'திரும்பி செல்வதை விட

இறப்பதே மேல்'

என்றான் நெப்போலியன்...

அதற்காக,

கடற்கரைக்கு சென்ற நாம்

சுனாமி வந்தால்

திரும்பாமல் இருக்க முடியுமா!

நிலவில் உழவு செய்ய

முயற்சியுங்கள் தப்பில்லை...

கிச்சுக்கிச்சு மூட்டி

சிரிக்க வைக்க முயற்சிக்காதீர்கள்

சாத்தியமில்லை!

முயற்சிக்கு

முற்றுப்புள்ளி இல்லை...

முயற்சியுங்கள்

முடியும் என்பதை

முழுமையாக உணர்ந்த பின்!

— ரேவதி நீலமேகம், சேலம்.