PUBLISHED ON : மே 01, 2011

அ நிறம் | அளவு
எதிர்காலம்
* பறவை உதிர்த்த
ஒற்றை இறகாய்
காற்றில் அலைகிறது...
நம் தேடல்கள்!
* பாழுங் கிணற்றில் போட்ட
கூழாங் கற்களாய்
குவிந்து கிடக்கிறது...
நம் லட்சியங்கள்!
* நூலறுந்த பட்டமாய் போய் விடுமா
தாயின் கனவுகள்...
காதறுந்த ஊசியென ஆகிவிடுமா
தந்தையின் கணிப்புகள்!
* பகல் உணவென்பது
பகல் கனவானாலும்
நிகழ்காலப் பசி இருட்டுக்கு
அகல் விளக்கேற்றுவோம்!
* வேற்றுக் கிரகம் வரை
வெற்றிக் கொடி நாட்ட வந்த நாம்
சோற்றுப் பருக்கையின்
சுகமான நினைவிலா
தோற்றுப் போவது?
* நம்
முகவரியை முன்மொழிய
உதடுகளே இல்லாதவர்களிடமா
ஒப்பாரி வைப்பது?
* நம்
கவிதைகள் அரங்கேற்ற
பாடைகளிடமா
மேடை கேட்பது?
* தொடர்ந்து ஜெயிக்காது
தோல்விகள்...
தொடர்ந்து தோற்காது
வெற்றிகள்...
வா... தோழா...
இறந்த காலம் செலவாகட்டும்...
எதிர்காலம் வரவாகட்டும்!
— எஸ்.பி.நீலமேகன், சென்னை.
