PUBLISHED ON : ஜூன் 14, 2020

அ நிறம் | அளவு
யாருக்கும் வெட்கமில்லை!
கருவிலே இனம் கண்டு
சிசுவை கல்லறைக்கு அனுப்பி வைக்கும்
காரியம் செய்வோருக்கு
வெட்கமில்லை!
கல்வி என்ற பெயரில்
கட்டண கொள்ளைகள்
நடத்தும் கல்வி நிலையங்களுக்கும்
வெட்கமில்லை!
பட்டாசு தொழிலுக்கு
பாலகரை பயன்படுத்தும்
பட்டாசு ஆலைகளுக்கும்
வெட்கமில்லை!
வஞ்சியருக்கு வாழ்வளிக்க
வரதட்சணை வாங்கும்
வாலிபத்துக்கும்
வெட்கமில்லை!
உண்ணாவிரதம் என்ற பெயரில்
உணவு திருவிழா நடத்தும்
உள்ளூர் கட்சிகளுக்கும்
வெட்கமில்லை!
குறுகிய காலத்தில்
கோடிகள் குவிக்கும் கொள்கையுடன்
கோலோச்ச வரும் கோமான்களுக்கும்
வெட்கமில்லை!
ஆம்...
கருவிலிருந்து கல்லறை வரை
சீரழியும் சமுதாயத்தை
சீர்திருத்த முயற்சிக்காத
யாருக்கும் வெட்கமில்லை!
கருணை வள்ளல், சென்னை.
