PUBLISHED ON : அக் 24, 2021

விலக்கி வைப்போம்!
நம் முன்னோர் வெட்டி விடாத
மரங்கள் தான்
இன்று நாம் இளைப்பாறும்
நிழலை விட்டு வைத்தது!
நம் முன்னோர் துார்க்காத
கிணறுகளும், குளங்களும் தான்
இன்று நாம் தாகம் தீர்க்கத்
தண்ணீரை விட்டு வைத்தது!
நம் முன்னோர் ஆக்கிரமிக்காத
வெட்டவெளி தான்
இன்று நாம் விளையாடும்
மைதானங்களை விட்டு வைத்தது!
நம் முன்னோர் அழிக்காத
வயல்களும், தோப்பும் தான்
இன்று நாம் பசியாறும்
உணவை விட்டு வைத்தது!
நம் முன்னோர் விலக்கிய
புகையும், மதுவும் தான்
இன்று நம் உடலுக்கான
ஆரோக்கியத்தை விட்டு வைத்தது!
நம் முன்னோர் விலக்கிய
ஆடம்பரமும், பகட்டும் தான்
இன்று நாம் குறையின்றி
வாழ்வதற்கான
வசதியை விட்டு வைத்தது!
எதையெதை
விலக்க வேண்டுமென்ற
அறிவுரையை அவர்கள்
எழுதி மட்டும் போகவில்லை
வாழ்ந்து காட்டி போயினர்!
இன்று நாம்
விலக்க வேண்டியவை
என்னவென்று யோசித்து
விலக்கி வைப்போம்...
நம் வழித்தோன்றல்களும்
நம்மைப் போல வாழ்வதற்கு!
கீர்த்தி, சென்னை.
