பாரதியின் நுாற்றாண்டை போற்று!

டிச., 11, பாரதியார் பிறந்த தினம் (நுாற்றாண்டு விழா சிறப்பு கவிதை)

பாருக்குள் நல்ல நாடு பாரத நாடென்றார்

நீருக்கு வங்கத்தை காட்டினார் - சீர்மிகு

சாரமாய் தேசத்து ஒற்றுமையை முன்மொழிந்த

பாரதியின் நுாற்றாண்டைப் போற்று!

செந்தமிழ் நாடெனும் போதினிலே இன்பத்தேன்

வந்து பாயும் காதினிலே என்றாரே - சிந்தையில்

தாரக மந்திரமாய் தாய் தமிழால் ஆர்ப்பரித்த

பாரதியின் நுாற்றாண்டைப் போற்று!

நேர்கொண்ட பார்வை நிமிர்ந்த நடையுமாய்

பாரில் புதுமைப்பெண் வார்த்தாரே - வீரமிகு

காரிகையர் கண்டெடுத்த மாசிலா நற்கவிஞர்

பாரதியின் நுாற்றாண்டைப் போற்று!

வல்லமை தாராயோ வேண்டியே கேட்டாரே

நல்லவை நாளும் நவின்றாரே - செல்வங்கள்

சேர்க்க விழையாமல் வித்தகத்தால் ஓங்கியவர்

பாரதியின் நுாற்றாண்டைப் போற்று!

நெஞ்சு பொறுக்குதில்லை இந்த நிலைகெட்டவர்

அஞ்சா இடமுமில்லை என்றாரே - துஞ்சாத

வீரத்தை வேரிலேயே வித்திட்ட ஞானகவி

பாரதியின் நுாற்றாண்டைப் போற்று!

ஆரமுது உண்டோர் அடிமையாகி நிற்பாரோ

சோர்வில் மயக்கும் மது அருந்தி - தீர்க்கமாய்

வீரச் சுதந்திரம் வேண்டியே நின்றாரே

பாரதியின் நுாற்றாண்டைப் போற்று!

தர்மத்தின் வாழ்வினை சூதும் சிலவேளை

கர்மத்தால் கவ்வகூடும் கள்ளமில்லை - தர்மங்கள்

ஆர்த்தெழுந்து சூதை அழிக்கும் இறுதிலென்றார்

பாரதியின் நுாற்றாண்டைப் போற்று!

சென்றது மீளாது சென்றதையே எண்ணாதீர்

இன்று புதிதாய் பிறந்தோம் என்றுரைப்பீர் - நன்குணர்ந்து

சாரதியாய் முன் நின்று சாற்றிய சக்திமான்

பாரதியின் நுாற்றாண்டைப் போற்று!

டி.ஆர்.வெங்கடேசன், பெங்களூரு