ஆடிப்பட்டத்தில் நிலங்கள், தரையில் பந்தல் அமைத்து அவரைச்செடி வளர்கின்றனர். இச்செடிகளில் காய்த்துளைப்பான், சாறு உறிஞ்சும் பூச்சிகள் அதிகம் தாக்கி மகசூல் பாதிக்கிறது.

காய்த்துளைப்பான்: அவரை செடியை பச்சைக்காய் துளைப்பான், புள்ளிக்காய் துளைப்பான், முள்காய் துளைப்பான், நீல வண்ணத்துப்பூச்சி ஆகிய நான்கு வகையான காய் துளைப்பான்கள் தாக்கி சேதம் விளைவிக்கிறது.

இவற்றில் பச்சைக்காய் துளைப்பான் தலையை மட்டும் காயின் உள்ளே விட்டு உடலை வெளிப்பக்கம் வைத்திருக்கும். அனைத்து வகையான காய் துளைப்பான்களும் காய்களை துளைத்து உள்ளிருக்கும் விதைகளை உண்டு அதிக சேதம் விளைவிக்கக் கூடியது. காய்கள் உருவாகும் முன் புழுக்கள் செடிகளின் குருத்து பகுதிகளையும், இலைகளையும் கடித்து உண்டு அழித்து விடும்.

கட்டுப்படுத்தும் முறை: நிலத்தை நன்றாக ஆழ உழுது மண்ணில் உள்ள கூட்டுப்புழுக்களை அழிக்க வேண்டும். பாதிக்கப்பட்ட மற்றும் துளையிடப்பட்ட காய்களை பறித்து அப்புறப்படுத்த வேண்டும்.

அவரை செடியில் காணப்படும் புழுக்களை எளிதாக கையால் சேகரித்து அழித்து விட வேண்டும். இனக்கவர்ச்சி பொறிகளை ஒரு ஏக்கருக்கு 5 வீதம் வைத்து ஆண் அந்து பூச்சிகளை கவர்ந்து அழிக்கலாம்.

'டி' வடிவ பறவை தாங்கிகள் அமைத்து வைப்பதால் பறவைகள் அதில் உட்கார்ந்து புழுக்களை பிடித்து உண்ணும். பச்சைக்காய்ப்புழு நச்சுயிரியை (என்.பி.வி.) ஒட்டும் திரவம் 1 மி.லி., / ஒரு லிட்டர் என்ற விகிதத்தில் கலந்து மாலை நேரங்களில் மட்டும் தெளிக்க வேண்டும். பூச்சிக்கொல்லி மருந்துகளான டைகுளோர்வாஸ் 250 மி.லி., அல்லது டிரைஅசோபாஸ் 300 மி.லி அல்லது இமாமெக்டின் பென்சோயேட் 5 சதவீதம் எஸ்.ஜி., 88 கிராம் அல்லது இன்டாக்சாகார்ப் 15.8 எஸ்.சி., 135 மி.லி., ஆகியவற்றை ஒரு ஏக்கருக்கு 250 லிட்டர் தண்ணீரில் கலந்து தெளிக்க வேண்டும்.

சாறு உறிஞ்சும் பூச்சிகள்: அவரையில் சாறு உறிஞ்சும் பூச்சிகளான அசுவினி, இலை தத்துப்பூச்சி, வெள்ளை ஈ மற்றும் நாவாய்ப்பூச்சி ஆகியவை தாக்கி சேதம் விளைவிக்கிறது. இப்பூச்சிகள் இலைகளின் அடிப்பாகம், மேல்பாகம், நுனி மொட்டு, பூக்கள் மற்றும் காய்களில் கூட்டம், கூட்டமாக இருந்து கொண்டு சாற்றை உறிஞ்சி விடுவதால், இலைகள் மஞ்சள் நிறத்தில் மாறும்.

அசுவினி அதிகமாக இருப்பின் அதிலிருந்து வரும் தேன் சுரப்புக்காக எறும்புகள் செடிகளில் மிக அதிகமாக இருக்கும். இளம் காய்கள் முதிராமல் பிஞ்சிலேயே உதிரும். முதிர்ந்த காய்கள் வளர்ச்சி இன்றி உள்ளே விதைகள் இன்றி மோசமாகக் காணப்படும்.

கட்டுப்படுத்தும் முறை: வெள்ளை ஈக்களை கட்டுப்படுத்த மஞ்சள் நிற ஒட்டும் பொறியை வைக்கலாம். வேப்பங்கொட்டை பருப்புச்சாறு கரைசல் 5 சதவீதம் அல்லது வேப்பெண்ணெய் கரைசல் 3 சதவீதம் ஆகியவற்றுடன் ஒட்டும் திரவம் 1 மி.லி.,க்கு 1 லிட்டர் கலந்து தெளிக்கலாம்.

- முனைவர். மா. விஷ்ணுப்பிரியா

சேது பாஸ்கரா கல்லுாரி, காரைக்குடி.

94425 42476