வாழை விவசாயிகள் தங்களின் வாழைகளில் பனாமா வாடல் நோய் ஏற்பட்டுள்ளதா என்பதை கண்காணிக்க வேண்டும். தாக்கப்பட்ட மரங்களின் அடி இலைகள் திடீரென முழுவதும் பழுத்து, தண்டுடன் சேரும் இடத்தில் சுற்றிலுமாக ஒடிந்து, மடிந்து வாழை தண்டை சுற்றிலும் துணி கட்டியது போல் காட்சியளிக்கும். பின்பு தண்டின் அடிப்பாகத்தில் மண்ணிலிருந்து மேல் நோக்கி நீளவாக்கில் வெடிப்பு ஏற்படும். கிழங்கினை குறுக்கே வெட்டிப்பார்த்தால் செம்பழுப்பு நிறத்தில் வட்ட வட்டமாக இப்பூஞ்சாணம் தாக்கி அழிந்துள்ள பகுதிகளை காணலாம்.

நுாற்புழு பாதிப்பு இருக்கும் தோட்டத்தில் வாடல் நோயின் அறிகுறிகள் அதிகளவில் காணப்படுகின்றன. வாடல் நோயின் வித்துக்கள் மண்ணில் பல ஆண்டுகள் உயிருடன் இருக்கும் தன்மையுடையது. பூஞ்சாண வித்துக்கள் முளைத்து பக்க வேர்கள் மூலமாக கிழங்கு பகுதியை தாக்கும். நோய் தாக்கிய கிழங்குகள் மூலமாகவும், பாசன நீர் மூலமாகவும் இந்நோய் ஓரிடத்தில் மற்ற இடத்திற்கு பரவுகிறது.

மேலாண்மை முறைகள்: வாழையில் வாடல் நோய் அதிகளவில் காணப்படும் நிலங்களில் இந்நோய்க்கு எதிர்ப்பு திறன் கொண்ட பூவன் (கதலி), ரொபஸ்டா, சக்கை போன்ற வாழை ரகங்களை பயரிடலாம்.

வாழைக்கன்றுகளை நோய் தாக்காத தோட்டங்களிலிருந்து தேர்வு செய்ய வேண்டும். விதைக்கிழங்குகளை பரிசோதித்து செந்நிற பகுதிகள் இல்லாதவற்றை தேர்வு செய்ய வேண்டும். நடுவதற்கு முன் களிமண் குழம்பில் நனைத்த கிழங்கின் மீது பத்து கிராம் 'சூடோமோனாஸ் புளுரசன்ஸ்' என்ற உயிரியல் பூசணக்கொல்லியினை சீராகத் துாவ வேண்டும். ஒரு ஏக்கருக்கு ஒரு கிலோ சூடோமோனாஸ் புளுரசன்ஸூடன் 20 கிலோ உலர்ந்த சாண எரு அல்லது மணலுடன் கலந்து ஒவ்வொரு வாழைக்கும் துார்ப்பகுதியினை சுற்றிலும் இட வேண்டும்.

காப்சூல் எனப்படும் மாத்திரை குப்பிகளில் 50 மில்லி கிராம் சூடோமோனாஸ் புளுரசன்ஸ் நிரப்பி நட்ட ஐந்தாம் மற்றும் ஏழாம் மாதங்களில் கிழங்கினுள் செலுத்த வேண்டும். கிழங்கில் 45 டிகிரி சாய்வாக 10 செ.மீ., ஆழ துளையிட்டு உள்ளே செலுத்த வேண்டும். வாழைத் தண்டில் செலுத்தினால் பயன் இல்லை.

குப்பியினை செலுத்திய பின் களிமண் உருண்டை கொண்டு துளை வாயிலை மூடி விட வேண்டும். மாத்திரை குப்பி வைப்பதை தக்க ஆலோசனை பெற்று வைக்க வேண்டும். நோய் தாக்கிய மரங்களை கிழங்கோடு பிடுங்கி அழித்து விட வேண்டும். அக்குழியில் போதிய அளவு சுண்ணாம்பு (குழிக்கு 1-2 கிலோ) இட வேண்டும்.

- முனைவர். இரா.விமலா

தலைவர், பருத்தி ஆராய்ச்சி நிலையம்

ஸ்ரீவில்லிபுத்துார்.