லோக்சபா தேர்தல் ஓட்டுகள் நாளை எண்ணப்படுகிறது. இதையடுத்து, அனைத்து மாவட்டங்களிலும் ஓட்டு எண்ணிக்கை நடக்கும் மையத்தை சுற்றிலும் பாதுகாப்பு நடவடிக்கைகள் எடுக்கப்பட்டு உள்ளன.

தேர்தல் கருத்து கணிப்புகளில் கர்நாடகாவில் பா.ஜ., அதிக இடங்களில் வெற்றி பெறும் என்றும்; குறிப்பாக பெங்களூரு ரூரலில் பா.ஜ., வெற்றி பெறும் என்று குறிப்பிடப்பட்டுள்ளது. இதனால் மஞ்சுநாத் உட்பட பா.ஜ., - ம.ஜ.த., தொண்டர்கள் 'குஷி' அடைந்துள்ளனர்.

ஓட்டு எண்ணிக்கையின் போது எந்த அசம்பாவிதமும் நடக்காதபடி பார்த்து கொள்ள, மாநில தேர்தல் தலைமை அதிகாரி அலுவலகத்துக்கு, பெங்களூரு ரூரல் பா.ஜ., வேட்பாளர் மஞ்சுநாத் கடிதம் எழுதி உள்ளார்.

அதில் குறிப்பிட்டு உள்ளதாவது:

 பெங்களூரு ரூரல் லோக்சபா தொகுதி ஓட்டு எண்ணிக்கை மையங்களில், கூடுதல் பாதுகாப்பு படையை அமைத்தல்

 சட்டம் - ஒழுங்கு சீர்குலையாமல் இருக்க, கூடுதல் போலீஸ், பாரா மிலிட்டரை படையை அமைத்தல்

 அத்துமீறி யாரும் உள்ளே நுழையாத வகையில், பாதுகாப்பு படையினர் நியமித்தல்

 ஓட்டு எண்ணிக்கை மையத்துக்குள் செல்வோர் யாராக இருந்தாலும், முழுமையாக சோதனையிட்டு அனுப்ப வேண்டும்

 அனுமதி அடையாள அட்டை உள்ள அதிகாரிகள், ஊடகத்தினரை மட்டுமே உள்ளே அனுமதிக்க வேண்டும்

இவ்வாறு அதில் குறிப்பிட்டுள்ளார்.

இதற்கு முன்னரும், 'ஓட்டுப்பதிவு நாளன்று கூடுதல் பாதுகாப்பு அளிக்கும்படி' மாநில தலைமை தேர்தல் அதிகாரி அலுவலகத்துக்கு மஞ்சுநாத் கடிதம் எழுதியிருந்தது குறிப்பிடத்தக்கது.