சட்டசபையில் நடந்த விவாதம்:

த.வெ.க., - மதார் பத்ருதீன்: மத்திய அரசு குடியுரிமை சட்டம், வக்ப் திருத்தச் சட்டம் கொண்டு வந்தபோது, அதற்கு எதிர்ப்பு குரல் கொடுத்து, முஸ்லிம்களின் பாதுகாவலனாக முதல்வர் விஜய் இருந்தார்.

ஆட்சிக்கு வருவதற்கு முன்பே இந்த சட்டங்களுக்கு எதிராக, உச்ச நீதிமன்றத்தில் வழக்கு தொடர்ந்தார். முஸ்லிம்களுக்கு 5 சதவீதம் அதாவது, 13 தொகுதிகளில் வாய்ப்பளித்தவர் விஜய்.

முஸ்லிம்களின் பாதுகாவலர் என்று சொல்லும் தி.மு.க.,வினர், கடந்த காலங்களில் முஸ்லிம்களுக்கு எதிராகப் பேசியுள்ளனர்.

மனிதநேய ஜனநாயக கட்சி - தமிமுன் அன்சாரி: முந்தைய தி.மு.க., ஆட்சியில், குடியுரிமை சட்டம், வக்ப் திருத்தச் சட்டத்திற்கு எதிராக, சட்டசபையில் தீர்மானம் நிறைவேற்றப்பட்டது. முஸ்லிம் சிறைவாசிகளை, தி.மு.க., அரசு விடுதலை செய்தது.

தி.மு.க., - எ.வ.வேலு: தமிழகத்தைப் பொருத்தவரை, முஸ்லிம்கள் பிரச்னை என்பது உணர்வுப்பூர்வமானது.

முஸ்லிம்களுக்கு பாதுகாவலனாக இருந்து, அவர்களின் கோரிக்கையை நிறைவேற்றிய கட்சி தி.மு.க.,தான். எனவே, எங்களை கொச்சைப்படுத்தி பேசுவதை ஏற்க முடியாது.

தி.மு.க., - கோவி.செழியன்: மதம் சம்பந்தப்பட்ட பிரச்னையை பேசும் போது, கவனமாக வார்த்தையை பயன்படுத்த வேண்டும். தி.மு.க., எப்போதும் முஸ்லிம்களுக்கு பாதுகாப்பு அரணாக இருக்கும்.

தமிமுன் அன்சாரி: சட்டசபையில் வைக்கப்படும் கருத்துகள், சபைக்கு வெளியே சட்டம்- ஒழுங்கு பாதிக்கப்பட காரணமாக இருந்து விடக்கூடாது. உணர்ச்சிகரமான பி ரச்னையில், பொறுப்பில்லாமல் பேசுவதை அனுமதிக்கக் கூடாது.

சபாநாயகர் பிரபாகர்: தான் பேசியதற்கு, மதார் பதுருதீன் ஆதாரத்தை என்னிடம் அளித்துள்ளார். சட்டசபையின் மாண்பு, மக்கள் நலன் கருதி, அதை வெளியிடவும் விவாதிக்கவும் விரும்பவில்லை.

மதார் பத்ருதீன்: 1999ல் முஸ்லிம்களுக்கு ஏற்பட்ட பாதிப்பையும், அதனால் ஏற்பட்ட பாதிப்பையும் தான் நான் பேசுகிறேன்.

சபாநாயகர் பிரபாகர்: மீண்டும், 1999ல் நடந்ததை நினைவுப்படுத்தி, யாரையும் காயப்படுத்த வேண்டாம்.

இவ்வாறு விவாதம் நடந்தது.