ஐ.பி.எல்., கோப்பையை ஆர்.சி.பி., அணி வென்றதை கொண்டாட ஏற்பாடு செய்யப்பட்டிருந்த பாராட்டு விழாவுக்கு வந்தபோது, கூட்ட நெரிசலில் சிக்கி, 11 பேர் உயிரிழந்தனர்.

இந்த விவகாரம் நேற்று சட்டசபையில் எதிரொலித்தது.

இதுதொடர்பாக, சட்டசபையில் நேற்று நடந்த விவாதம்:

எதிர்க்கட்சி தலைவர் அசோக்: ஆர்.சி.பி., வெற்றி கொண்டாட்டத்தின்போது ஏற்பட்ட கூட்ட நெரிசலில் சிக்கி 11 பேர் உயிரிழந்த சம்பவம் தொடர்பாக, ஒத்திவைப்பு தீர்மானத்தின் மீது விவாதிக்க, சபாநாயகரின் அலுவலகத்திற்கு ஏற்கனவே நோட்டீஸ் வழங்கி உள்ளேன்.

அமைச்சர் பரமேஸ்வர்: இந்த சம்பவம் தொடர்பான வழக்கு, உயர் நீதிமன்றத்தில் நிலுவையில் உள்ளதால், இப்போது விவாதிக்க முடியாது என்ற விதிமுறை உள்ளது.

அசோக்: அப்படி ஒன்றும் குறிப்பிடவில்லை. நாம் விவாதிக்கும் விஷயங்கள், நீதிமன்றத்தில் எதிரொலிக்கக் கூடாது என்றும் அதே விதிமுறையில் குறிப்பிடப்பட்டுள்ளது. நீதிமன்றத்தில் நிலுவையில் உள்ள பல விஷயங்கள் குறித்து விவாதிக்கப்பட்டுள்ளது.

இந்த சம்பவத்தை, சந்தோசமாக நான் குறிப்பிடவில்லை. நானும் ஒரு கிரிக்கெட் ரசிகர் தான்.

ப ரமேஸ்வர் : விதிகளில் உள்ளதை சொல்லுவது என் கடமை. சபாநாயகர் என்ன முடிவு வேண்டுமானாலும் எடுக்கட்டும்.

சபாநாயகர் காதர்: ஒத்திவைப்பு தீர்மானத்தின் கீழ் விவாதிக்க அவகாசம் இல்லை. விதி எண்: 69ன் கீழ் விவாதிக்க வாய்ப்பு தருகிறேன்.

அசோக்: ஹஜ் யாத்திரை மேற்கொண்ட சபாநாயகர், இவ்வளவு சீக்கிரமாக வரம் கொடுத்துவிட்டால் எப்படி?

சபாநாயகர்: வரம் கொடுக்கவில்லை என்றால், கொடுக்கவில்லையே என்கிறீர்கள்; கொடுத்தால், ஏன் கொடுத்தீர்கள் என்கிறீர்கள்.

அசோக்: ஒரு 5 நிமிடங்கள் பேசுவதற்கு வாய்ப்பு தருங்கள். அதற்குள், உள்துறை அமைச்சர் எதிர்ப்பு தெரிவிக்கிறார்.

சபாநாயகர்: விதி எண்: 69ன் கீழ் பேசுங்கள்.

சுனில்குமார் - பா.ஜ.,: அதற்குள் மேட்சை முடித்துவிட்டால் எப்படி?

அசோக்: நாளை பே சுகிறேன்.

இவ்வாறு விவாதம் நடந்தது.