புத்தாண்டு என்றதும் தீர்மானங்கள் தான் நினைவுக்கு வரும் என்றாலும், நிதி திட்டமிடலை சீராக்குவதற்கான வாய்ப்பாகவும் புதிய ஆண்டின் துவக்கத்தை பயன்படுத்திக் கொள்ள வேண்டும். புத்தாண்டிற்கான நிதி பயணம் சிக்கல் இல்லாமல் அமையவும், எதிர்பார்த்த பலன்களை பெறுவதற்கான உத்திகளை வகுத்துக்கொள்ளவும் நிதி திட்டமிடல் உதவுகிறது.

முதலீடுகளை பரிசீலனை செய்வது, இடர் அம்சங்களை கவனத்தில் கொள்வது, பரவலாக்கத்தை நாடுவது, வரி சேமிப்பு உள்ளிட்ட விஷயங்களில் கவனம் செலுத்த வேண்டும் என்று வல்லுனர்கள் வலியுறுத்துகின்றனர்.

நிதி நாட்காட்டி

புதிய ஆண்டை துவக்கும் நிலையில், முதலில் மனதில் கொள்ள வேண்டிய விஷயம் நிதி நாட்காட்டி என்கின்றனர். நிதி நோக்கில் முக்கியமாக அமையும் நாட்களையே இவ்வாறு குறிப்பிடுகின்றனர்.

வரி மற்றும் கடன் பொறுப்பு, முதலீடுகள், நிதி சீராய்வு உள்ளிட்டவற்றை குறித்த காலத்தில் செய்து முடிக்க நிதி நாட்காட்டி உதவும். அடுத்ததாக, நிதி இலக்குகளை மனதில் கொள்ள வேண்டும்.

நிதி இலக்குகள் எனும் போது உடனடி இலக்குகள், நீண்ட கால இலக்குகள் என வகைப்படுத்தி, அவற்றுக்கு ஏற்ற வகையில் திட்டமிட வேண்டும். கோடைக்கால விடுமுறை பயணம், கல்வி கட்டணம், ஓய்வு கால முதலீடு போன்றவற்றை மனதில் கொள்ள வேண்டும்.

முதலீடு என்று வரும் போது பரவலாக்கமும், இடர் நிர்வாகமும் முக்கியம் என்கின்றனர். முதலீடுகள், சம பங்கு, கடன்சார் சாதனங்கள், தங்கம் என பல்வேறு சொத்து வகைகளில் பொருத்தமான விகிதங்களில் அமைந்திருக்க வேண்டும்.

முதலீடுகள் அளிக்கும் பலன் முக்கியம் என்றாலும், அதிக பலன் எனில் இடர் அம்சமும் அதிகமாகும் இருக்கும். எனவே, முதலீட்டின் இடர் அம்சம், நிதி இலக்குகளுக்கு ஏற்ப அமைந்திருக்க வேண்டும். முதலீட்டாளர்கள் தங்கள் வயதையும் கவனத்தில் கொள்ள வேண்டும்.

பட்ஜெட் முக்கியம்

நிதி திட்டமிடல் என்பது ஒரு முறை செயல் அல்ல; மாறாக தொடர்ச்சியானது என்பதை உணர வேண்டும்.

நிதி இலக்குகள், முதலீடு உள்ளிட்ட அம்சங்களை கவனிக்கும் போது, ரொக்க நிலையையும் கணக்கில் கொள்வது நல்லது. இதற்கு வரவு - செலவுகளை ஆய்வு செய்து, தேவையில்லாத செலவுகளை தவிர்க்க வேண்டும்.

அவசர கால நிதி கைவசம் இருப்பதை உறுதி செய்து கொள்வதும் அவசியம். எதிர்பாராத நெருக்கடிக்காக அந்த நிதியை பயன்படுத்தியிருந்தால், மீண்டும் உண்டாக்க மறக்கக்கூடாது.

கடன் பொறுப்புகள் இருந்தால், மாதத் தவணையை தவறாமல் செலுத்துவதை உறுதி செய்வதோடு, அசலின் ஒரு பகுதியை முன்கூட்டியே அடைப்பதற்கான வாய்ப்பை பரிசீலிக்க வேண்டும். ஆயுள் மற்றும் மருத்துவ காப்பீடு போதுமானதாக இருப்பதையும் ஆராய வேண்டும்.

முதலீடுகளை பொருத்தவரை தங்கம் கடந்த ஆண்டு போலவே இந்த ஆண்டும் முக்கியமானதாக இருக்கும் என்று கருதப்படுகிறது.

பணவீக்கம் மற்றும் வட்டி விகித போக்கையும் கவனத்தில் கொள்ள வேண்டும். வரி சேமிப்பிற்கான திட்டமிடலையும் இப்போதே துவங்குவது அவசியம். சேமிப்பு மற்றும் முதலீட்டின் அளவை அதிகரிப்பதற்கான வாய்ப்புகளையும் கண்டறிவது உதவும்.