UPDATED : அக் 09, 2026 05:17 PM
ADDED : அக் 09, 2026 05:10 PM

தொழில் தொடங்க வேண்டும் என்ற எண்ணம் பலருக்கும் இருக்கிறது. ஆனால், முதலீட்டுக்குப் பணம் எங்கே கிடைக்கும், வங்கிக் கடன் பெறுவது எப்படி, அரசு மானியம் உள்ளதா என்ற கேள்விகள் பலரையும் தயங்க வைக்கின்றன.
தொழில்முனைவோருக்காக மத்திய, மாநில அரசுகள் பல்வேறு திட்டங்களைச் செயல்படுத்தி வருகின்றன. கடன், மானியம் மட்டுமல்லாமல், பயிற்சி, தொழில்நுட்ப மேம்பாடு, சந்தைப்படுத்துதல், கடன் உத்தரவாதம் என தொழிலின் வெவ்வேறு தேவைகளுக்கும் உதவிகள் கிடைக்கின்றன.
தொடக்கத்துக்குத் துணை
புதிய தொழில் தொடங்க விரும்புபவர்களுக்கு மத்திய அரசின் பிரதமரின் வேலைவாய்ப்பு உருவாக்கத் திட்டம் (பி.எம்.இ.ஜி.பி.) முக்கியமான திட்டமாக உள்ளது. வேளாண்மை அல்லாத துறைகளில் புதிய குறுந்தொழில்களைத் தொடங்குவதற்குக் கடனுடன் இணைந்த மானிய உதவி இதில் வழங்கப்படுகிறது.
உற்பத்தித் துறையில் ரூ.50 லட்சம் வரையிலும், சேவைத் துறையில் ரூ.20 லட்சம் வரையிலும் திட்டச் செலவு கணக்கில் எடுத்துக்கொள்ளப்படுகிறது. பயனாளியின் பிரிவு மற்றும் தொழில் அமையும் இடத்தைப் பொறுத்து மானிய விகிதம் மாறுபடும்.
கடனுக்கு உதவி
தொழில் தொடங்குவதில் மற்றொரு தடையாக இருப்பது பிணையம். சொத்து அடமானம் இல்லாமல் கடன் பெற முடியுமா என்ற கேள்வி பலருக்கும் இருக்கும்.
குறு, சிறு தொழில்களுக்கான கடன்களுக்கு கடன் உத்தரவாதம் வழங்கும் கடன் உத்தரவாத நிதியமைப்பு (சி.ஜி.டி.எம்.எஸ்.இ.) இதற்கு உதவுகிறது. தகுதியுள்ள வங்கிகள் மற்றும் நிதி நிறுவனங்கள் மூலம் வழங்கப்படும் கடன்களுக்கு, குறிப்பிட்ட விதிமுறைகளின் கீழ் உத்தரவாத வசதி கிடைக்கிறது.
தமிழகத்துக்கு வாய்ப்புகள்
மத்திய அரசின் திட்டங்களுடன் தமிழக அரசும் புதிய தொழில்முனைவோரை உருவாக்கவும், ஏற்கெனவே இயங்கி வரும் தொழில்களை வளர்க்கவும் பல்வேறு திட்டங்களைச் செயல்படுத்துகிறது.
புதிய தொழில்முனைவோர் மற்றும் தொழில் நிறுவன மேம்பாட்டுத் திட்டம் (நீட்ஸ்), வேலைவாய்ப்பற்ற இளைஞர்களுக்கான வேலைவாய்ப்பு உருவாக்கத் திட்டம் (யு.ஒய்.இ.ஜி.பி.) போன்றவை தொழில் தொடங்க விரும்புபவர்களுக்கு பயன்படக்கூடிய திட்டங்களாக உள்ளன.
இதுதவிர, தகுதியுள்ள தொழில் நிறுவனங்களுக்கு மூலதன மானியம், வேலைவாய்ப்பு உருவாக்கத்துக்கான சலுகைகள், குறிப்பிட்ட பிரிவினருக்கான கூடுதல் சலுகைகள் போன்றவையும் வழங்கப்படுகின்றன.
தேர்வு செய்வது எப்படி?
தொழில்முனைவோர் முதலில் தன்னுடைய தொழிலைத் தெளிவாகத் திட்டமிட வேண்டும். என்ன தொழில், எவ்வளவு முதலீடு தேவை, சொந்த முதலீடு எவ்வளவு, கடன் எவ்வளவு தேவை, சந்தை யார், எத்தனை பேருக்கு வேலை கிடைக்கும் என்பதற்கான பதில்கள் தெளிவாக இருக்க வேண்டும்.
அதன் பிறகு, தன்னுடைய தொழிலுக்கும் தகுதிக்கும் பொருந்தும் அரசுத் திட்டத்தைத் தேர்வு செய்யலாம். ஒருவருக்குப் பொருந்தும் திட்டம் மற்றொருவருக்கும் பொருந்த வேண்டும் என்ற அவசியம் இல்லை.
விண்ணப்பிக்கும் முன்
அரசுத் திட்டங்களில் விண்ணப்பிக்கும்போது அதிகாரப்பூர்வ இணையதளங்களில் உள்ள தற்போதைய விதிமுறைகளைச் சரிபார்ப்பது அவசியம். திட்டத்தின் தகுதி, மானிய அளவு, கடன் வரம்பு, தேவையான ஆவணங்கள் ஆகியவை காலத்துக்கு ஏற்ப மாறக்கூடும்.
மாவட்ட தொழில் மையங்களையும் அணுகலாம். திட்டம், விண்ணப்ப நடைமுறை, தொழில் திட்ட அறிக்கை, வங்கிக் கடன் உள்ளிட்ட விவரங்களை அங்கு தெரிந்துகொள்ள முடியும்.
அரசுத் திட்டங்கள் ஒரு தொழிலை உருவாக்கித் தருவதில்லை. ஆனால், தொழில் தொடங்கத் தயாராக இருப்பவருக்குத் தேவையான இடத்தில் ஆதரவாக நிற்கின்றன. அந்த வாய்ப்பைச் சரியாக அடையாளம் கண்டு பயன்படுத்திக் கொள்வதே தொழில்முனைவோரின் அடுத்த முக்கியமான படி.
பாக்ஸ் 1
பிரதமரின் வேலைவாய்ப்பு உருவாக்கத் திட்டம்
புதிய குறுந்தொழில் தொடங்க விரும்புபவர்களுக்கு மத்திய அரசின் பிரதமரின் வேலைவாய்ப்பு உருவாக்கத் திட்டம் (பி.எம்.இ.ஜி.பி.) உதவுகிறது.
உற்பத்தித் தொழில் – ரூ.50 லட்சம் வரை
சேவைத் தொழில் – ரூ.20 லட்சம் வரை
கடனுடன் இணைந்த மானிய உதவி
பயனாளியின் பிரிவு, தொழில் அமையும் இடம் ஆகியவற்றைப் பொறுத்து மானிய விகிதம் மாறும்.
பாக்ஸ் 2
கடனுக்கு உத்தரவாதம்
பிணையம் இல்லாமல் தொழில் கடன் பெறுவதில் சிக்கல் உள்ள குறு, சிறு தொழில்முனைவோருக்கு கடன் உத்தரவாத நிதியமைப்பு (சி.ஜி.டி.எம்.எஸ்.இ.) உதவுகிறது. தகுதியுள்ள வங்கிகள் மற்றும் நிதி நிறுவனங்கள் வழங்கும் கடன்களுக்கு, திட்ட விதிமுறைகளின்படி கடன் உத்தரவாத வசதி கிடைக்கும். இது நேரடியாகப் பணம் வழங்கும் திட்டம் அல்ல; கடனுக்கான உத்தரவாத அமைப்பாகச் செயல்படுகிறது.
பாக்ஸ் 3
தொழில் வாய்ப்புகள்
தமிழக அரசின் குறு, சிறு மற்றும் நடுத்தரத் தொழில்கள் துறையின் கீழ் பல்வேறு தொழில்முனைவு திட்டங்கள் செயல்படுகின்றன.
புதிய தொழில்முனைவோர் மற்றும் தொழில் நிறுவன மேம்பாட்டுத் திட்டம் (நீட்ஸ்)
வேலைவாய்ப்பற்ற இளைஞர்களுக்கான வேலைவாய்ப்பு உருவாக்கத் திட்டம் (யு.ஒய்.இ.ஜி.பி.)
மூலதன மானியம்
வேலைவாய்ப்பு உருவாக்கத்துக்கான சலுகைகள்
குறிப்பிட்ட பிரிவினருக்கான கூடுதல் சலுகைகள்
திட்டத்துக்கு ஏற்ப தகுதி, முதலீடு, மானியம் மற்றும் விண்ணப்ப நடைமுறைகள் மாறுபடும்.
