பொதுவான நிலைமை:

எல்லா கூட்டுறவு வங்கிகளிலும் பிரச்னை இல்லை; பல வங்கிகள் பல ஆண்டுகளாக நிதி ஆரோக்கியத்துடன் உள்ளன. வாடிக்கையாளர்களின் முதலீட்டுக்கு பாதுகாப்பை வழங்குகின்றன.

ஆர்.பி.ஐ., நடவடிக்கை:

ஒருசில கூட்டுறவு வங்கிகளில் நிதி முறைகேடுகள் அல்லது நிர்வாக குளறுபடிகள் தெரிய வரும்போது, வாடிக்கையாளரின் நலன் காக்க, ஆர்.பி.ஐ., கடுமையான நடவடிக்கைகளை எடுக்கிறது.

எத்தகைய நடவடிக்கைகள்:

கூட்டுறவு வங்கியில் இருந்து எடுக்கப்படும் தொகையின் அளவை மட்டுப்படுத்துதல், நிர்வாக குழுவில் இருப்போரை மாற்றியமைத்தல்.

வாடிக்கையாளர் புரிதல்:

இத்தகைய நடவடிக்கைகள் முன்னெச்சரிக்கை என்பதால், வாடிக்கையாளர்கள் பயப்படக் கூடாது.

வட்டி விகிதம் மற்றும் கடன்:

கூட்டுறவு வங்கிகள் பொதுத்துறை, தனியார் துறை வங்கிகளை விட சற்றே கூடுதலான வட்டி விகிதம் தருகின்றன, கடன்கள் விஷயத்திலும் சற்று தாராளமாக இருக்கின்றன.

காப்பீடு வசதி:

கூட்டுறவு வங்கிகளில் செய்யப்படும் முதலீட்டுக்கு 5 லட்சம் ரூபாய் வரை வைப்பு நிதிக் காப்பீடு உள்ளது. அதனால், மொத்த பணமும் பறிபோய்விடுமோ என்ற பயம் தேவையில்லை.

முன் எச்சரிக்கை:

முதலீட்டாளர்கள் பெரிய தொகைகளை ஒரே கூட்டுறவு வங்கியின் சேமிப்புத் திட்டங்களில் போட்டு வைப்பதை தவிர்க்கலாம்.

புத்திசாலித்தனம்:

பரவலாக பல்வேறு இடங்களில் முதலீடு செய்வது புத்திசாலித்தனம்.

கண்காணிப்பின் அவசியம்:

முதலீடு செய்துள்ள கூட்டுறவு வங்கிகளை பற்றி ஆர்.பி.ஐ., ஏதேனும் சொல்லியிருக்கிறதா, வங்கி ஏதேனும் சுற்றறிக்கை வெளியிட்டிருக்கிறதா என்பதை கூர்ந்து கவனிக்க வேண்டும். நிதி நிலைமை பாதிப்புக்குள்ளாகும் என்று தோன்றினால், முதலீட்டைத் திரும்ப எடுத்துவிடலாம்.

சில அபாயங்கள்

 ஒரு கூட்டுறவு வங்கியில் நிதி நெருக்கடி ஏற்பட்டால், ரிசர்வ் வங்கி அதை தடையாணையின் கீழ் கொண்டு வரலாம்

 தடையாணையின் போது 5 லட்சம் ரூபாய் காப்பீடு இருந்தாலும், வைப்புத் தொகையை உடனடியாக முழுதுமாக எடுக்க முடியாது

 இந்த நிலை வாடிக்கையாளர்களின் பணப் புழக்கத்தை பாதிக்கலாம்

 வங்கி உரிமம் பெறாத சில கூட்டுறவு சங்கங்கள், 'வங்கி' என்ற வார்த்தையைப் பயன்படுத்துகின்றன. இங்குள்ள வைப்புத்தொகை, காப்பீட்டின் கீழ் வராது.