ஐ.பி.ஓ., வெளியீட்டு விலையை விட 96 சதவீதம் கூடுதல் விலையில் பட்டியலிடப்பட்டதால், ஒதுக்கீடு பெற்ற முதலீட்டாளர்களின் பணம் இரு மடங்காக உயர்ந்தது. இந்த ஆண்டின் முதல் ஐ.பி.ஓ., முதலீட்டாளர்களுக்கு நல்ல லாபம் ஈட்டித் தந்து உள்ளது.

இந்நிறுவன பங்குகள் பி.எஸ்.இ.,-யில் ரூ.45.21 மற்றும் என்.எஸ்.இ.,-யில் ரூ.45 என வர்த்தகத்தை துவங்கிய நிலையில், மதிய நேர வர்த்தகத்துக்கு பிறகு, பங்கு விலை சரிய ஆரம்பித்து, என்.எஸ்.இ.,-யில் ரூ.40.58-க்கும், பி.எஸ்.இ.,-யில் ரூ.40.66-க்கும் வர்த்தகத்தை முடித்தது.

ஸ்டீல் துறையில் அதிகரித்து வரும் தேவை, உள்நாட்டில் கோக்கிங் கோல் கிடைப்பதில் உள்ள பற்றாக்குறை ஆகிய காரணங்களால் இந்த பங்குக்கு முதலீட்டாளர்களிடம் மவுசு அதிகரித்திருப்பதாக தெரிகிறது.

முதலீட்டாளர்களின் பெரும் பங்கேற்பால் பாரத் கோக்கிங் கோல் நிறுவனத்தின் ஆரம்ப பங்கு வெளியீடு 146.81 மடங்கு அதிகமாக சந்தா பெற்றது. 1,071 கோடி ரூபாய் மதிப்புள்ள இந்த புதிய பங்கு வெளியீட்டில், விலை வரம்பு பங்கு ஒன்றுக்கு ரூ.21-.23 வரை நிர்ணயிக்கப்பட்டிருந்தது குறிப்பிடத்தக்கது.