இந்த காப்பீட்டு கட்டுரையின் முந்தைய பகுதியில், டெங்கு, அமீபியாசிஸ் போன்ற மழைக்கால நோய்களுக்கு நமது மருத்துவ காப்பீட்டில் பாதுகாப்பு இருக்கிறதா என்பதை உறுதி செய்துகொள்வது குறித்து பார்த்தோம்.

இந்த முறை, நமது வாகனங்களுக்கு சரியான காப்பீட்டு பாதுகாப்பு இருப்பதை எப்படி உறுதி செய்வது என்று பார்க்கலாம்.

மழைக்கால அபாயங்களை பொறுத்தவரை வாகனங்களுக்கு மூன்றாம் நபர் காப்பீடு மட்டும் போதாது. உங்கள் வாகனத்துக்கு சொந்த சேத காப்பீடு இருக்கிறதா என்பதை பார்க்க வேண்டும். மழை அல்லது வெள்ளத்தால் வாகனத்துக்கு ஏற்படும் சேதத்துக்கு இந்த காப்பீடுதான் இழப்பீடு அளிக்கும்.

பொதுவாக வெள்ளம் அல்லது நீர் சூழ்தல் இந்த காப்பீட்டில் பாதுகாக்கப்படும். ஆனால், தண்ணீர் உள்ளே புகுவதால் இன்ஜின் அல்லது கியர்பாக்ஸுக்கு ஏற்படும் தொடர் விளைவு சேதம், நீரால் இன்ஜின் முடங்கும் நிலை போன்றவற்றுக்கும் பாதுகாப்பு உள்ளதா என்பதை பார்க்க வேண்டும்.

'வெள்ளத்தால் ஏற்படும் சேதத்துக்கு காப்பீடு உண்டு' என்பதற்கும், 'இந்த குறிப்பிட்ட வெள்ள சேதத்துக்கு காப்பீடு உண்டு' என்பதற்கும் உள்ள வித்தியாசத்தை புரிந்துகொள்வது அவசியம்.

இல்லையென்றால், கூடுதல் பிரீமியம் செலுத்தி அதற்கான கூடுதல் காப்பீட்டை வாங்க முடியுமா என்று கேட்கலாம். தாழ்வான பகுதியில் வசிப்பவர்கள் அல்லது வாகனத்தை திறந்தவெளியில் நிறுத்துபவர்கள் இதை பரிசீலிக்கலாம்.

தனியார் காருக்கான காப்பீட்டு பாலிசியில், 'இன்ஜின் பாதுகாப்பு', 'இன்ஜின் மற்றும் கியர்பாக்ஸ் பாதுகாப்பு','நீரால் இன்ஜின் முடங்குவதில் பாதுகாப்பு' போன்ற கூடுதல் காப்பீடுகள் உள்ளனவா என்று பார்க்க வேண்டும். அவற்றின் விதிமுறைகளில் தண்ணீர் புகுவதால் ஏற்படும் சேதம், இன்ஜின் மற்றும் கியர்பாக்ஸுக்கான தொடர் விளைவு சேதம் போன்றவை குறிப்பிடப்பட்டுள்ளனவா என்பதையும் கவனிக்க வேண்டும்.

வெள்ளத்தில் கார் சிக்கினால் என்ன செய்வது?

உங்கள் வீட்டின் அடித்தள கார் நிறுத்துமிடத்தில் கார் வெள்ளத்தில் மூழ்கியிருக்கலாம். அல்லது வெள்ளம் சூழ்ந்த சாலையில் ஓட்டி சென்றபோது தண்ணீர் புகுந்து வாகனம் நின்றிருக்கலாம்.

அப்போது மிக முக்கியமாக, கார் வெள்ளத்தில் சிக்கியிருந்தாலோ, தண்ணீர் புகுந்ததால் இன்ஜின் நின்றுவிட்டாலோ, மீண்டும் சாவியை பயன்படுத்தி இன்ஜினை இயக்க முயற்சிக்க கூடாது. தள்ளி இயக்கவும் முயற்சிக்க கூடாது.

மீண்டும் மீண்டும் இன்ஜினை இயக்க முயற்சித்தால், சிறிய அளவிலான நீர் சேதம் பெரிய இன்ஜின் சேதமாக மாறலாம். இதனால் காப்பீட்டு கோரிக்கையும் சிக்கலாகலாம்; சில சூழ்நிலைகளில் மறுக்கப்படவும் வாய்ப்பு உள்ளது.

எனவே, உடனடியாக காப்பீட்டு நிறுவனத்துக்கு தகவல் தெரிவித்து, இழுவை வண்டி வாயிலாக வாகனத்தை எடுத்து செல்ல ஏற்பாடு செய்ய வேண்டும். அதன்பிறகு, காப்பீட்டு நிறுவனத்துடன் இணைந்து காப்பீட்டு கோரிக்கையை பதிவு செய்ய வேண்டும். பெரிய பழுதுபார்ப்பு பணிகளை, காப்பீட்டு நிறுவனம் அனுமதித்த பிறகே மேற்கொள்ள வேண்டும்.

காப்பீட்டு நிறுவனத்துக்கு தகவல் தெரிவிப்பதில் தாமதம் ஏற்பட்டு, அதன் காரணமாக வாகனத்தை மீட்பதிலும் தாமதம் ஏற்பட்டால், சில பாலிசிகளில் அது காப்பீடு மறுக்கப்படுவதற்கான காரணமாக குறிப்பிடப்பட்டிருக்கலாம். எனவே, விரைவாக செயல்படுவது முக்கியம்.

பதிவு செய்யுங்கள்

வாகனத்தை நகர்த்துவதற்கு முன், அது எந்த நிலையில் இருக்கிறது என்பதை பதிவு செய்து வைக்க வேண்டும். தண்ணீர் எந்த அளவுக்கு உயர்ந்திருந்தது என்பதை காட்டும் வகையில், இடத்தை குறிக்கும் தகவலுடன் கூடிய புகைப்படங்கள் மற்றும் காணொலிகளை எடுக்கலாம்.

வாகனம் எங்கே நின்றது அல்லது நிறுத்தப்பட்டிருந்தது என்பதும், கண்ணுக்கு தெரியும் சேதங்களும் பதிவுகளில் தெளிவாக இருக்க வேண்டும். மேலும், தேய்மான கழிவு இல்லாத பாதுகாப்பு, சாலையோர உதவி, இழுவை வண்டி சேவை, பயன்படுத்தப்படும் சிறு உதிரி பொருட்களுக்கான பாதுகாப்பு போன்ற கூடுதல் காப்பீடுகளையும் பரிசீலிக்கலாம். இல்லையென்றால், இவற்றுக்கான செலவுகள் கணிசமாக இருக்கக்கூடும்.

எனவே, உங்கள் கார் காப்பீட்டு பாலிசியில் வெள்ள சேதத்துக்கு காப்பீடு இருக்கிறது என்பதாலேயே, வெள்ளத்தால் ஏற்படும் எல்லா வகையான சேதங்களுக்கும் காப்பீடு இருக்கிறது என்று அர்த்தமல்ல.

உங்கள் வீட்டுக்கான தீக்காப்பீட்டுக்கும் மழைக்கால ஆய்வு தேவை. அதை பற்றி அடுத்த காப்பீட்டு கட்டுரையில் பார்க்கலாம்.

பொறுப்பு துறப்பு: பங்கு, கமாடிட்டி உள்ளிட்ட பல்வேறு சந்தைகளில் செய்யும் முதலீடுகள் சந்தை அபாயத்திற்கு உட்பட்டது. முதலீடு செய்வதற்கு முன்பு சம்பந்தப்பட்ட அனைத்து ஆவணங்களையும் கவனமாகப் படிக்கவும். எந்தவொரு நிறுவனத்தின் பங்குகளில் முதலீடு செய்வதற்கு முன்பாக, செபி பதிவு பெற்ற முதலீட்டு ஆலோசகரை கலந்தாலோசித்து, அவற்றில் முதலீடு செய்வதில் இருக்கும் ரிஸ்க், உங்களுக்கு உகந்த அளவில் இருக்கிறதா என்பதை தெரிந்து, அதன் பின் முதலீட்டை மேற்கொள்ளவும். இந்தப் பகுதியில் கொடுக்கப்பட்டுள்ள விலை/வால்யூம் போன்ற தகவல்கள் முந்தைய வர்த்தக நாளின் இறுதியில் அந்தந்த எக்ஸ்சேஞ்சுகளின் இணையதளத்தில் இருந்தும்; விலை இலக்குகள் குறித்த தகவல்கள் (ஏதும் தரப்பட்டிருந்தால்) குறிப்பிடப்பட்டுள்ள தரகு நிறுவனத்தின் இணையதளத்தில் இருந்தும் திரட்டப்பட்டதாகும்.மேலே தரப்பட்டுள்ள விபரங்கள் சரியானவைதானா என்றும்; அவற்றின் உண்மைத்தன்மை குறித்தும் சரிபார்த்துக்கொள்வது வாசகர்/முதலீட்டாளரின் முழுப்பொறுப்பாகும். இதில் தவறுகள் ஏதும் இருந்தாலோ / இதை நம்பி செயல்பட்டு வரக்கூடிய எந்த விதமான நஷ்டத்துக்கோ, தினமலர் நாளிதழோ அல்லது அதைச் சார்ந்த நபர்களோ எந்த விதத்திலும் பொறுப்பாக மாட்டார்கள்.