ஒரு நாள் ஏற்றம், மற்றொரு நாள் இறக்கம் என்கிற நிலை மாறி, ஒரே நாளில் ஏற்ற இறக்கத்தை சந்திக்கும் சந்தையாக உருவெடுத்திருப்பதை பார்த்து, முதலீட்டாளர்கள் குழப்பம் அடைந்திருக்கிறார்கள்.

இப்படியான பங்குச் சந்தையை முதலீட்டாளர்கள் எப்படி அணுக வேண்டும் என்பது குறித்து 'பிரைம் இன்வெஸ்டார்' நிறுவனத்தின் நிறுவனர் ஸ்ரீகாந்த் மீனாட்சி கூறியதாவது:

பங்குச் சந்தை என்பது மனித குணங்களால் கட்டமைக்கப்பட்டது என்பதால், திடீர் சரிவும், திடீர் உயர்வும் சாதாரணமான ஒரு விஷயம்.

டிரம்ப் தும்மினால் ஏற்றம், அவர் இருமினால் இறக்கம் என்கிற ரீதியில்தான் தற்போதைய சந்தையின் நடவடிக்கைகள் இருக்கின்றன. இதுமாதிரியான சந்தையை கணிக்க நினைப்பதே தவறு. என்ன செய்வது என்று யோசித் தும் குழம்பாதீர்கள்.

 அடுத்த ஐந்து ஆண்டுகளுக்கு தேவைப்படாத பணம் உங்களிடம் இருந்தால், சந்தை எப்போது சரிந்தாலும் பயமில்லாமல் துணிந்து முதலீடு செய்யுங்கள். ஆனால், மொத்தமாக ஒரே நாளில் முதலீடு செய்யாமல், கொஞ்சம் கொஞ்சமாக பணத்தை பிரிக்க வேண்டும். உதாரணமாக, உங்கள் பணத்தை நான்கு பாகங்களாக பிரித்து, ஒவ்வொரு 2 சதவீத வீழ்ச்சியிலும் ஒவ்வொரு பாகத்தை முதலீடு செய்யலாம்

 நீங்கள் 10 ஆண்டுகளுக்கு முதலீடு செய்கிறீர்கள் என்றால், தினசரி மாற்றங்களை கவனிக்காதீர்கள். நேரத்தை கணிப்பதை விட, சந்தையில் எவ்வளவு காலம் இருக்கிறீர்கள் என்பதே லாபத்தை தீர்மானிக்கும்

 தற்போது சந்தை 13 சதவீதத்துக்கு மேல் சரிவை சந்தித்துள்ளது. செய்திகளில் எல்லாம் சரிவு என்றே பேசப்படுகிறது. இதை தவிர முதலீடு செய்ய சிறந்த நேரம் கிடைக்கவே கிடைக்காது. இந்த சூழலில் தரமான பங்குகளை பார்த்து முதலீடு செய்வதுதான் முதலீட்டாளர்களின் மிக முக்கியமான வேலை

 சந்தை உயர்ந்தாலும், சரிந்தாலும், நீங்கள் முதலீடு செய்துள்ள நிறுவனத்தின் லாபம் மற்றும் வளர்ச்சி சரியாக இருக்கிறதா என்பதை மட்டும் கவனியுங்கள். காலையில் சரிவை பார்த்து பயந்து விற்காமல், அமைதியாக இருப்பதே ஒரு சிறந்த முதலீட்டாள ரின் அடையாளம். சுருக்கமாக சொன்னால், சந்தை சில நேரங்களில் காரணமே இல்லாமல்கூட தள்ளாடலாம். ஆனால் நீண்ட கால அடிப்படையில் ஏற்றத்தின் பாதையில் பயணிக்கும்.

இவ்வாறு அவர் தெரிவித்தார்.