குல்பூஷண் ஜாதவ், பாகிஸ்தானில் உளவு பார்த்தார் என அந்நாட்டு ராணுவ நீதிமன்றம் மரண தண்டனை விதித்தது. இதை எதிர்த்து இந்தியா சர்வதேச நீதிமன்றத்தை நாடியது. சர்வதேச நீதிமன்றம், குல்பூஷண் ஜாதவ்வை இந்திய தூதரக அதிகாரிகள் சந்திக்க அனுமதி அளிக்க வேண்டும் எனவும் அடுத்த உத்தரவு வரும் வரையில் மரண தண்டனையை நிறைவேற்ற கூடாது எனவும் பாகிஸ்தானுக்கு உத்தவிட்டது.

இது குறித்து கருத்து கூறியுள்ள நீதிபதி மார்க்கண்டேய கட்ஜூ, குல்பூஷண் ஜாதவ் விவகாரத்தில் இந்தியா சர்வதேச நீதிமன்றத்தை நாடியது பெரிய தவறு என கூறியுள்ளார். இது தொடர்பாக ஃபேஸ்புக்கில் அவர் வெளியிட்டுள்ள செய்தியில், குல்பூஷண் ஜாதவ் விவகாரத்தில் என்னுடைய கருத்து என்னவென்றால் இந்தியா சர்வதேச நீதிமன்றத்தை நாடி பெரிய தவறை செய்துள்ளது.

இதன்மூலம் பாகிஸ்தான் பல்வேறு பிரச்னையை சர்வதேச நீதிமன்றத்தில் எழுப்ப இந்தியா வழி செய்துள்ளது. இந்தியா சர்வதேச நீதிமன்றத்தை நாடியதில் பாகிஸ்தான் அதிக எதிர்ப்பு தெரிவிக்காததற்கு இதுவே உண்மையான காரணம். நாம் சர்வதேச நீதிமன்றத்தை நாடியதில் பாகிஸ்தான் மகிழ்ச்சி அடையும். நாம் இப்போது வரையில் எதிர்ப்பு தெரிவிக்கும் காஷ்மீர் விவகாரம் உட்பட பிற பிரச்னைகளை பாகிஸ்தான் சர்வதேச நீதிமன்றத்திற்கு கொண்டு செல்லும் என கட்ஜு கூறியுள்ளார்.