ஹாசன் லோக்சபா தொகுதி ம.ஜ.த., - எம்.பி., பிரஜ்வல் ரேவண்ணா, 33. இவரது தந்தை ரேவண்ணா, 66, ஹொளேநரசிபுரா தொகுதியின் ம.ஜ.த., - எம்.எல்.ஏ.,வாக உள்ளார். சில பெண்களுடன் பிரஜ்வல் நெருக்கமாக இருக்கும் ஆபாச வீடியோக்கள் மற்றும் புகைப்படங்கள் சமீபத்தில் வெளியாகி பரபரப்பை ஏற்படுத்தின.

இந்நிலையில், பிரஜ்வலும், அவரது தந்தை ரேவண்ணாவும், தன்னை பலாத்காரம் செய்ததாக, அவர்களது வீட்டு வேலைகார பெண் புகார் அளித்தார். அதனடிப்படையில், தந்தை - மகன் மீது ஹொளேநரசிபுரா போலீசார் வழக்கு பதிவு செய்தனர். உடன், வழக்கு சிறப்பு புலனாய்வு குழுவான, எஸ்.ஐ.டி.,யின் விசாரணைக்கு மாற்றப்பட்டது.

இதையடுத்து, பிரஜ்வாலால் தான் பாதிக்கப்பட்டதாக கூறி, நேற்று முன்தினம் மேலும் ஒரு பெண், ஹாசன் மாவட்ட மாஜிஸ்திரேட் முன் ரகசிய வாக்குமூலம் அளித்தார். இது, இரண்டாவது புகாராக பதிவானது. அதுமட்டுமின்றி, பிரஜ்வல் மீது ஹாசனை சேர்ந்த, ம.ஜ.த., பெண் பிரமுகர் ஒருவரும், சிறப்பு புலனாய்வு குழு ஏ.டி.ஜி.பி., பிரிஜேஷ்குமார் சிங்கிற்கு மின்னஞ்சல் வாயிலாக புகார் அனுப்பி உள்ளார்.

அந்த புகாரில் கூறியிருப்பதாவது:

ஹாசன் மாவட்ட பஞ்சாயத்து கவுன்சிலராக முன்னர் பதவி வகித்தேன். 2021ல் எனக்கு தெரிந்த கல்லுாரி மாணவியர் சிலருக்கு, விடுதியில் அறை வாங்கிக் கொடுப்பது தொடர்பாக, ஹாசனில் உள்ள எம்.பி., அலுவலகத்தில் பிரஜ்வலை சந்தித்தேன். மாடியில் உள்ள அறைக்கு என்னை அழைத்துச் சென்றார். என்னை படுக்கையில் பிடித்து தள்ளி, பலாத்காரம் செய்ய முயன்றார்; நான் எதிர்ப்பு தெரிவித்தேன்.

'உன் கணவரால் தான், என் அம்மா பவானிக்கு கிடைக்க வேண்டிய எம்.எல்.ஏ., சீட் பறிபோனது. எனக்கு ஒத்துழைக்கா விட்டால், உன்னையும், உன் கணவரையும் சுட்டுக் கொல்வேன்' என்று பிரஜ்வல் மிரட்டினார். பின், துப்பாக்கி முனையில் என்னை பலாத்காரம் செய்தார். அதை வீடியோ மற்றும் புகைப்படமாகவும் எடுத்தார். நடந்த சம்பவத்தை வெளியே சொன்னால், வீடியோவை வெளியிடுவேன் என்றும் மிரட்டினார். அதன்பின், பல முறை என்னை பலாத்காரம் செய்தார். சிறப்பு புலனாய்வு குழு மீது நம்பிக்கை இருப்பதால் புகார் செய்கிறேன்.

இவ்வாறு புகாரில் கூறியுள்ளார்.

இந்தப் புகாரின்படி, பிரஜ்வல் மீது இந்திய தண்டனை சட்டம் பிரிவு 376 (2) (என்), ஒரே பெண்ணை தொடர்ந்து பலாத்காரம் செய்வது; 354 (ஏ) (1) வலுக்கட்டாயமாக பாலியல் உறவு கொள்வது; 354 (பி) ஆடைகளை அகற்றும் நோக்கில் பெண்ணை தாக்குவது; 66 (இ) தனியுரிமையை மீறுவது உள்ளிட்ட பிரிவுகளில் வழக்குப்பதிவு செய்யப்பட்டுள்ளது.

* முன்ஜாமின் வாபஸ்

பிரஜ்வல், ரேவண்ணா மீது, முதலில் அவர்கள் எளிதில் ஜாமினில் வெளிவரும் பிரிவுகளில் தான் வழக்குப்பதிவு செய்யப்பட்டது. இதற்கு கண்டனம் எழுந்ததால், தற்போது கடுமையான பிரிவுகளில் வழக்கு பதிவாகி உள்ளது. இந்த பிரிவுகளில் குற்றம் நிரூபிக்கப்பட்டால் பத்து ஆண்டுகள் வரை சிறை தண்டனை கிடைக்க வாய்ப்பு உள்ளது.

இதற்கிடையில், விசாரணைக்கு ஆஜராகும்படி பிரஜ்வல், ரேவண்ணாவுக்கு, சிறப்பு புலனாய்வு குழு இரண்டு முறை சம்மன் அனுப்பியது. பிரஜ்வல் வெளிநாட்டில் இருப்பதால், விசாரணைக்கு ஆஜராக அவகாசம் கேட்டுள்ளார். ரேவண்ணா உள்ளூரில் இருந்தும், விசாரணைக்கு ஆஜராகவில்லை. கைது நடவடிக்கையில் இருந்து தப்பிக்க, மக்கள் பிரதிநிதிகள் நீதிமன்றத்தில் மனு செய்தார்.

இந்த மனு மீது நேற்று விசாரணை நடந்த போது, சி.ஐ.டி., சார்பில் ஆஜரான வக்கீல் ஜெகதீஷ் வாதாடுகையில், ''மனுதாரர் மீது பலாத்கார வழக்கு பதிவாகவில்லை. ஜாமினில் வெளிவரக்கூடிய வகையில் தான், வழக்குப் பதிவாகி உள்ளது. இதனால், அவருக்கு முன்ஜாமின் கொடுக்க வேண்டிய அவசியம் இல்லை,'' என்று வாதிட்டார். இதை ரேவண்ணா தரப்பும் ஏற்றுக்கொண்டு, முன்ஜாமின் மனுவை திரும்பப் பெற்றது.

* பவானிக்கு சம்மன்

அதேநேரத்தில், ஹொளேநரசிப்புரா அருகே படுவலஹிப்பே, சென்னராயப்பட்டணா அருகே கன்னிகடாவில் உள்ள, ரேவண்ணாவுக்கு சொந்தமான பண்ணை வீட்டில், நேற்று அதிகாலை 4:00 மணிக்கு, விசாரணை அதிகாரி சீமா லட்கர் தலைமையில், சிறப்பு புலனாய்வு குழுவினர் அதிரடி சோதனை நடத்தினர். மற்றொரு குழுவினர் ஹொளேநரசிப்புரா ஹரதனஹள்ளியில் உள்ள ரேவண்ணா வீட்டிலும் சோதனை நடத்தினர்.

இந்த சோதனையின் போது, ரேவண்ணா மனைவியான பவானியின் அம்மா மட்டுமே வீட்டில் இருந்தார். சோதனை முடிந்ததும், விசாரணைக்கு ஆஜராக 3வது நோட்டீஸை, ரேவண்ணா வீட்டின் கதவில் ஒட்டிவிட்டு, விசாரணை குழுவினர் அங்கிருந்து சென்றனர்.

விசாரணைக்கு ஆஜராகும்படி, ரேவண்ணா மனைவி பவானிக்கும் சம்மன் அனுப்பப்பட்டு உள்ளது. இதுபோல, பெங்களூரு பசவனகுடியில் உள்ள ரேவண்ணா வீட்டிலும், விசாரணை அதிகாரி சுமன் பன்னேகர் தலைமையிலான குழுவினர் சோதனை நடத்தினர். ஹாசனில் சோதனை நடத்திய விசாரணை குழு அங்கேயே தங்கி உள்ளது.