பிரதமர் மோடி தலைமையிலான அரசு மூன்றாவது முறையாக பதவி ஏற்றபின், முதல் அமைச்சரவை குழு கூட்டம் நேற்று முன்தினம் நடந்தது. இதில், பல்வேறு துறைகளுக்கான நிதி ஒதுக்கீடுக்கு ஒப்புதல் வழங்கப்பட்டது.

நெல் உட்பட, 14 காரிப் கால பயிர்களுக்கு, 2024 - 25ம் ஆண்டுக்கான குறைந்தபட்ச ஆதரவு விலை உயர்த்தப்பட்டுஉள்ளது.

குவின்டாலுக்கு 117 ரூபாய் முதல் 983 ரூபாய் வரை விலை உயர்த்த ஒப்புதல் அளிக்கப்பட்டுள்ளது. இதன் வாயிலாக விவசாயிகளுக்கு 2 லட்சம் கோடி ரூபாய் அளவுக்கு பலன் கிடைக்கும். இந்த விலை உயர்வு, பண வீக்க விகிதங்களை பாதிக்காது என்றும் அரசு தெரிவித்து உள்ளது.

விமான நிலைய விரிவாக்கம்: உத்தர பிரதேசத்தின் வாரணாசி விமான நிலைய விரிவாக்க பணிகளுக்கு 2,800 கோடி ரூபாய் முதலீடுக்கு ஒப்புதல் அளிக்கப்பட்டது.

புதிய முனையம், ஓடுதளம் உள்ளிட்டவை அமைக்கப்பட உள்ளன. பயணியர் வந்து செல்லும் திறன், ஆண்டுக்கு 39 லட்சத்தில் இருந்து, 1 கோடியாக உயர்த்தவும் கட்டமைப்பு வசதிகள் செய்யப்பட உள்ளன.

புதிய துறைமுகம்: மஹாராஷ்டிராவின் பால்கார் மாவட்டத்தில் உள்ள வாத்வானில், புதிய துறைமுக கட்டுமானத்துக்கு 76,220 கோடி ரூபாய் நிதி ஒதுக்க ஒப்புதல் அளிக்கப்பட்டது.

புதுப்பிக்கத்தக்க எரிசக்தி: கடல் காற்றாலை மின் உற்பத்தி திட்டங்களுக்கு 7,453 கோடி ரூபாய் நிதி ஒதுக்க ஒப்புதல் அளிக்கப்பட்டுள்ளது. இதில், 6,853 கோடி ரூபாய் நிதி, 1 கிகாவாட் மின் உற்பத்தி திட்டத்தை செயல்படுத்தவும், 600 கோடி ரூபாய் துறைமுக மேம்பாட்டுக்கும் செலவிடப்பட உள்ளது.

தடயவியல் மேம்பாடு: புதிய குற்றவியல் சட்டங்களை செயல்படுத்த ஆதரவு அளிக்கும் நோக்கத்தில், தேசிய தடயவியல் உள்கட்டமைப்பு மேம்பாட்டுத் திட்டத்தை மத்திய அரசு அறிவித்துள்ளது. இதன் கீழ், 2024 - 25 முதல் 2028 - 29 வரையிலான காலகட்டத்தில், தடயவியல் துறையை மேம்படுத்தும் பணிகளுக்காக 2,254 கோடி ரூபாய் ஒதுக்க ஒப்புதல் அளிக்கப்பட்டது.

உற்பத்தி சார்ந்த ஊக்கத் தொகை: மருத்து, ஸ்டீல், தகவல் தொடர்பு, ஜவுளி, உணவு பொருட்கள் உட்பட 10 துறைகளில் உற்பத்தி சார்ந்த ஊக்கத் தொகை திட்டத்துக்கு, 2 லட்சம் கோடி ரூபாய் நிதி ஒதுக்கப்பட்டுள்ளது.

கேபினட் குழுவின் இந்த முதல் கூட்டத்தில், மொத்தம் 2.88 லட்சம் கோடி ரூபாய் மதிப்பிலான பொருளாதார நடவடிக்கைகளுக்கு ஒப்புதல் அளிக்கப்பட்டுள்ளது.