ஆந்திர மாநிலம் சித்துாரில் இருந்து கர்நாடகாவின் பெங்களூரு நோக்கி நேற்று ஆந்திர மாநில சாலை போக்குவரத்து கழக பஸ், 50க்கும் மேற்பட்ட பயணியருடன் சென்றது.

சித்துார் - பெங்களூரு நெடுஞ்சாலையில் பாலமனேரு அருகே மொகிலி காட் பகுதியில் சென்றபோது எதிரே வந்த லாரி மீது மோதி விபத்தில் சிக்கியது.

இதில், பஸ்சில் சென்ற ஏழு பயணியர் பரிதாபமாக உயிரிழந்தனர்; 10 பேர் காயம் அடைந்தனர்.

தகவல் அறிந்து விரைந்து வந்த போலீசார் விபத்தில் உயிரிழந்த ஏழு பேரின் சடலங்களை மீட்டனர்.

காயம் அடைந்தவர்களை மீட்டு அருகேயுள்ள மருத்துவமனைக்கு அனுப்பி வைத்தனர். விபத்து தொடர்பாக போலீசார் வழக்குப்பதிவு செய்து விசாரிக்கின்றனர்.